اسلام آباد (مانیٹرنگ ڈیسک) نیپرا نے بجلی کی قیمت بڑھانے کی اجازت دے دی۔ نجی ٹی وی کی رپورٹ کے مطابق نیشنل الیکٹرک پاور ریگولیٹری اتھارٹی نے سہ ماہی ایڈجسٹمنٹس کے تحت بجلی مہنگی کرنے کی منظوری دے دی ہے، بجلی تقسیم کار کمپنیوں نے مالی سال2019-20ء کی چوتھی سہ ماہی ایڈجسٹمنٹ کے لئے درخواست دی تھی،

نیپرا کے مطابق بجلی کی تقسیم کار کمپنیوں نے مالی سال 2020-21ء کی پہلی اور دوسری سہ ماہی ایڈجسٹمنٹ کے لیے در خواستیں دی تھیں۔ نیپرا کے اعلامیہ میں کہا گیا ہے کہ گھریلو صارفین کے لئے 8 پیسے فی یونٹ اضافے کی منظوری دی گئی ہے جبکہ کمرشل صارفین کے لئے 11 پیسے فی یونٹ اضافے کی منظوری دی گئی ہے۔ نیپرا کے مطابق بجلی کی قیمتوں میں اضافہ اکتوبر 2021 سے لاگو کیا جائے گا،اعلامیہ کے مطابق اس ٹیرف کی ایڈجسٹمنٹ ایک سال تک لاگو رہے گی، اطلاق تمام صارفین پر ہو گا صرف لائف لائن اور 300 یونٹ تک استعمال کرنے والوں پراس کا اطلاق نہیں ہوگا۔ کے الیکٹرک کے صارفین بھی اس سے مستثنیٰ ہوں گے۔دوسری جانب عید قرباں میں ابھی 20 روز باقی ہیں لیکن عوام کی قربانی ابھی سے شروع ہوگئی‘ ٹماٹر۔پیاز۔لہسن اور ادرک کی قیمتوں میں اضافہ نے شہریوں کو مزید پریشان کردیا ہے۔عیدقرباں سے پہلے ہی عوام کی قربانی۔ٹماٹر۔پیاز۔لہسن اور ادرک کی قیمت میں اضافہ کردیا گیا ہے۔20 روپے کلو میں فروخت ہونے والا ٹماٹر 80 روپے میں پہنچ گیا۔ادرک 4 سو روپے کلو سے 480 روپے کلو ہوگیالہسن 150 روپے سے 2سو روپے کلو پہنچ گیا ہے۔25 روپے کلو پیاز 40 روپے کلو فروخت ہونے لگا۔شہریوں کا کہنا ہے کہ حکومت مہنگائی کنٹرول کرنے میں مکمل ناکام ہوچکی ہے۔عید آنے میں کافی دن رہتے ہیں لیکن سبزی کی قیمت میں اضافہ کردیا گیا ہے انہوں نے مزید کہا کہ حکومت کو عوام کی مشکلات سے کوئی غرض نہیں ہے۔