اسلام آباد (این این آئی)فیٹف نے پاکستانی اقدامات اور عملدرآمد سے متعلق رپورٹ جاری کردی جس کے مطابق ایشیاء پیسفک گروپ نے پاکستانی عملدرآمد رپورٹ میں واضح پیش رفت تسلیم کرلی۔ جاری اعلامیہ کے مطابق فیٹف ایشیاء پیسفک گروپ میوچوئل ایوالویشن رپورٹ جاری کی ہے، پاکستان نے اے پی جی کی 40 میں سے 31
سفارشات پر عمل کیا ہے،سفارشات پر عملدرآمد پاکستان کی فیٹف معاملات پر سنجیدگی کو ظاہر کرتا ہے۔ وزارت خزانہ کے مطابق پاکستان انسداد منی لانڈرنگ اور انسداد دہشت گرد فنانسنگ روکنے کیلئے عالمی معیار پر پورا اترا ہے، پاکستان نے 21 سفارشات پر نہایت قلیل وقت بے مثال اور غیر معمولی انداز میں عملدرآمد کیا۔وزارت خزانہ کے مطابق 2019ء میں اسی رپورٹ کے مطابق پاکستان نے 10 نکات پر عملدرآمد کیا تھا۔ وزارت خزانہ کے مطابق پاکستان نے سفارشات پر عملدرآمد کیلئے 14 وفاقی اور تین صوبائی قوانین میں ترامیم کیں، ان قوانین سے نہ صرف نظام مضبوط ہوا بلکہ استحکام بھی سامنے آیا۔وزارت خزانہ کے مطابق پاکستان نے تکنیکی عملدرآمد رپورٹ اکتوبر 2020ء میں فیٹف کو جمع کرائی تھی۔وزارت خزانہ کے مطابق ایشیاء پیسفک گروپ نے پاکستان کی کوششوں کو سراہا، پاکستان نے اے پی جی گروپ میں دوبارہ درجہ بندی کیلئے رپورٹ جمع کرائی ہے۔وزیر توانائی حماد اظہر نے کہا ہے کہ پاکستان نے فیٹف کی 40 میں سے 31 شرائط پر عملدرآمد مکمل کر دیا۔ اپنے بیان میں انہوں نے کہاکہ فیٹف کی ان شرائط پتر ایشیا پیسفک گروپ کی شرائط سے الگ عملدرآمد کیا جا رہا ہے،پاکستان کی طرف سے دو سال میں 20 شرائط پر عملدرآمد فیٹف کی تاریخ میں ایسی مثال نہیں،دو سال میں 14 وفاقی اور 3 صوبائی قوانین پر قانون سازی ہوئی اور قواعد و ضوابط کا اطلاق کیا گیا،یہ سب کچھ 20 سے زائد وفاقی وزارتوں اور اداروں کی کوششوں سے ممکن ہوا۔
