اسلام آباد(نیوز ڈیسک) وزیر ریلوے شیخ رشید احمد نے کہاہے کہ 24مارچ سے34ٹرینیں 15رمضان تک معطل کرنے کا نوٹیفکیشن جاری کردیاہے، ریلوے کی پنشن حکومت اداکرے،پاکستان ریلوے کے 20 فیصد مسافر کم ہو گئے،مزید8ٹرینیں یکم اپریل کوبندکریں گے ٹرینوں کی بندش سے 3.28ارب روپے ریلوے کوخسارہ ہوگا۔ مال بردار ٹرنیوں سے خسارہ پورا کرنے کی کوشش کریں گے ۔

ان خیالات کااظہاروزیر ریلوے شیخ رشید احمد نے پی آئی ڈی میں پریس کانفرنس کرتے ہوئے کیا۔وزیر ریلوے شیخ رشید احمدنے کہاکہ حکومت ریلوے کو سبسڈی دینے کے بجائے ریلوے ملازمین کی پنشن ادا کرے۔ کورونا وائرس کی وجہ سے 34ٹرینیں معطل کر دی ہیں جس سے ریلوے کے 20 فیصد مسافر کم ہو گئے ہیں۔شیخ رشید نے کہا کہ 15 رمضان تک ٹرینیں معطل کرنے کا نوٹیفکیشن جاری کیا ہے، حالات بہتر ہونے پر معطل ٹرینیں بحال کی جائیں گی کیونکہ دو لاکھ مسافروں کو ان حالات میں ہینڈل کرنا مشکل ہے۔ ملک کو لاک ڈان کرنے سے متعلق سوال پر وفاقی وزیر نے کہا کہ لاک ڈائون کا اختیار میرا نہیں وزیراعظم عمران خان کا ہے۔ انہوں نے کہا کہ کورونا نہیں خوف و ہراس خطرناک ہے، کورونا وبا پر اپوزیشن نے ذمہ داری کا ثبوت دیا ہے، اس حوالے سے اپوزیشن کی جانب سے کوئی اختلافی بیان سامنے نہیں آیا۔ریلوے ملازمین کو نکالنے کے سوال پر انہوں نے کہا کہ کسی ملازم کو نہیں نکالا جا رہا، حکومت ریلوے کو سبسڈی دینے کے بجائے ریلوے ملازمین کی پنشن ادا کرے۔