اسلام آباد (این این آئی) چیئرمین ایف بی آر سید محمد شبر زیدی نے تمام بینکوں کو مراسلہ ارسال کیا ہے جس میں کہا گیا ہے کہ بینکوں کی طرف سے مختلف اکاؤنٹ ہولڈرز کی طرف سے خریدے گئے بانڈز کی تفصیلات ابھی تک ایف بی آر کو فراہم نہیں کی گئیں۔ چیئرمین ایف بی آر نے مراسلے میں تمام بینکوں کے سربراہان کو یاد دہانی کرائی ہے کہ بانڈہولڈرز کی تفصیلات فنانشل ایکشن ٹاسک فورس کی شرائط کے تحت بھی مطلوب ہیں۔ مزید یہ کہ ایسے اکاؤنٹ ہولڈرز کی رقوم انکم ٹیکس
گوشواروں میں بھی ظاہر نہیں ہو رہی۔ بانڈ واشنگ کے تحت ٹیکس ادائیگی کو چھپایا جا رہا ہے اور ودہولڈنگ ٹیکس ادا نہیں کیا جا رہا،کمپنیوں کی فنانشل سٹیٹمنٹ اور ریکارڈ کے مطابق ایسی رقوم آف بیلنس شیٹ کے طور پر ظاہر ہوتی ہیں، لین دین کے نظام کو ریگیولیٹ کرنے کے تحت تمام دولت اور ودہولڈنگ کوقانون کے تحت ظاہر کرنا ضروری ہے۔ چیئرمین ایف بی آر نے ایک مرتبہ دوبارہ تمام بینکوں سے درخواست کی ہے کہ و ہ اس سلسلے میں ضروری معلومات فوراََ فراہم کریں۔
