اسلام آباد(یو این پی) سرطان ایک ایسا خطرناک مرض ہے جس کے علاج کیلئے خطیر رقم کے ساتھ ساتھ طویل وقت بھی درکار ہوتا ہے۔ تاہم ماہرین نے کھانے کی ایسی چیز بتادی ہے جو کینسر سے بچا سکتی ہے۔ دنیا بھر میں ہر سال لاکھوں لوگ سرطان کے مرض میں مبتلا ہو جاتے ہیں اور ان میں سے کئی افراد کو یہ مرض موت کا راستہ دکھا دیتا ہے۔ تاہم ماہرین کا کہنا ہے کہ اگر صحت مندانہ خوراک اپنائی جائے تو ہر طرح کے کینسر سے 30 سے 40 فیصد تک بچا جا سکتا ہے۔

ایک حالیہ تحقیق کے مطابق ماہرین نے بتایا ہے کہ زیتون کا تیل کینسر سے بچاسکتا ہے۔ ماہرین کا کہنا ہے کہ زیتون کا تیل دماغ کے کینسر سے بچا ؤکے لیے انتہائی اہمیت رکھتا ہے۔ اس میں ایک ایسا کمپاونڈ پایا جاتا ہے جو کینسر کے ٹیومرز کو پیدا ہونے سے روکتا ہے۔ ماہرین کے مطابق زیتون کے تیل کا بنیادی جزو اولیک ایسڈ دماغ کے اندر موجود ان مالیکیولز کی مقدار اور کارکردگی میں اضافہ کرتا ہے جو خطرناک کینسر کے خلیات کو پیدا ہونے اور نشوونما پانے سے روکتے ہیں۔