حیدر آباد دکن(آئی این پی )بھارت میں نظام دکن کا ہیرے جڑا سونے کا لنچ باکس اور دیگر اشیاء چوری ہو گئیں، تین کلو وزنی ان اشیا کی قیمت تقریبا 70 لاکھ ڈالر ہے۔ بی بی سی کی خبر کے مطابق بھارت کے جنوبی شہر حیدرآباد میں پولیس سابق حکمران نظام دکن کے ہیرا جڑے طلائی ٹفن کریئر کی چوری کی جانچ کر رہی ہے۔چوروں نے اس کے علاوہ یاقوت اور سونے کی بنی ایک چائے کی پیالی، طشتری اور چمچہ بھی چوری کر لیا ہے۔

تین کلو وزنی ان اشیا کی قیمت تقریبا 70 لاکھ ڈالر بتائی جا رہی ہے۔اس چوری کا پیر کی صبح کو پتہ چلا۔ پولیس کو شبہ ہے کہ یہ چوری اس سے پہلے والی رات کو ہوئی۔پولیس نے بی بی سی تیلگو کو بتایا کہ انھیں دو لوگوں پر چوری کا شبہ ہے۔انڈیا کے معروف اخبار ہندوستان ٹائمز کے مطابق پولیس نے مقامی صحافیوں کو بتایا کہ چوروں نے سی سی ٹی وی کیمرے سے چھیڑ چھاڑ کی تاکہ ان کی چوری کی کوئی ریکارڈنگ نہ ہو سکے۔اس کے ساتھ انھوں نے یہ بھی بتایا کہ جس شیشے کی الماری میں یہ چیزیں رکھی ہوئی تھیں ان کے شیشوں کو سکریو کھول کر نکالا گیا ہے۔یہ چیزیں نظام میوزیم میں تھیں جس کا افتتاح 2000 میں کیا گیا تھا۔ اس کے نوادرات میں میر عثمان علی خان کو سنہ 1937 میں دیے گئے بیش قیمتی تحائف شامل ہیں۔عثمان علی خان انڈیا کی سب سے بڑی ریاست حیدرآباد کے حکمران تھے۔ ان کا انتقال 1967 میں ہوا تھا۔ان کے مشہور زمانہ خزانے میں یعقوبی یعنی سفید ہیرا بھی شامل تھا جو ایک انڈے کے برابر تھا اور اسے دنیا میں موجود پانچواں سب سے بڑا ہیرا کہا جاتا ہے۔اس کے علاوہ دوسرے جواہرات بھی ان کے خزانے میں شامل تھے۔