اسلام آباد (نیوز ڈیسک) سابق وزیر داخلہ چودھری نثار علی خان مسلم لیگ(ن) کے پلیٹ فارم سے ٹکٹ نہ ملنے پرانتخابات 2018ء میں آزاد امیدوار کی حیثیت سے سیاسی دنگل میں اترے جہاں ان کو بدترین شکست کا سامنا کرنا پڑا اور وہ صرف ایک صوبائی اسمبلی کی سیٹ سے ہی جیت پائے جبکہ نیشنل اسمبلی کی سیٹ پر چودھری نثار کو پاکستان تحریک انصاف کے

رہنماء غلام سرور خان نے شکست دی تھی تاہم اب چودھری نثار ایک بار پھر ملکی سیاست میں سرپرائز دینے جا رہے ہیں۔ تحریک انصاف کے معتبر ذرائع نے دعویٰ کرتے ہوئے کہا کہ چودھری نثار بہت جلد تحریک انصاف میں باقاعدہ شمولیت اختیار کرنے جا رہے ہیں، چودھری نثار علی خان بہت جلد وزیر اعظم پاکستان اور پاکستان تحریک انصاف کے چیئرمین عمران خان سے ون آن ون ملاقات بھی متوقع ہے۔ یہاں یہ امر بھی قابل ذکر ہے کہ انتخابات سے قبل یہ دعویٰ بھی سامنے آیا تھا چودھری نثار علی خان نے پاکستان مسلم لیگ(ن) کی جانب سے ٹکٹ نہ ملنے پر پی ٹی آئی میں شمولیت کا حتمی فیصلہ کیا تھا اوراس سلسلہ میں انہوں نے اپنے قریبی اور خاندانی رفقاء سے بھی مشورہ لیاتھا، دوسری جانب پاکستان تحریک انصاف کے چیئرمین اور وزیر اعظم پاکستان عمران خان نے بھی ن لیگ کے سینئر رہنما اور سابق وزیر داخلہ چودھری نثار علی خان کو پارٹی میں شمولیت کی دعوت دیتے ہوئے کہا تھا کہ سیاست میں بعض اوقات دل بڑا کرنا پڑتا ہے، چودھری نثار تحریک انصاف میں آجائیں تو اچھا ہے لیکن آزاد حیثیت سے الیکشن لڑنے پر بھی ان کی حمایت کریں گے تاہم بعد میں تحریک انصاف نے بھی انکے مقابلے میں اپنا امیدوار میدان میں اتار دیا تھا۔