پشاور(این این آئی)محکمہ سیاحت خیبرپختونخوا نے سینئر صوبائی وزیر سیاحت محمد عاطف کی ہدایات پر خیبرپختونخوا کو عالمی سطح پر بطور سیاحتی برانڈ متعارف کرانے کیلئے ستمبر میں ہونے والے عالمی یوم سیاحت پر سیاحوں کی سہولت کے پیش نظر نئی ویب اور موبائل ایپ متعارف کرنے کا فیصلہ کیا ہے ،
اس سلسلے میں گزشتہ روز سیکرٹری محکمہ سیاحت ، ثقافت ، کھیل ،میوزیم ، آثارقدیمہ و امورنوجوانان شاہد زمان کی زیر صدارت کانفرنس روم ٹورازم کارپوریشن میں اجلاس منعقد ہوا جس میں ایڈیشنل سیکرٹری بابر خان ، مینجمنٹ انفارمیشن سسٹم کی ٹیم اور دیگر شخصیات موجود تھیں ، اجلاس میں سیکرٹری محکمہ سیاحت کو ویب سائٹ اور موبائل ایپ سے متعلق بریفنگ دی گئی ، اس موقع پر بتایا گیا کہ ویب سائیڈ اور موبائل ایپ کے متعارف ہونے سے دنیا بھر میں سیاحوں کو خیبرپختونخوا کے سیاحتی مقامات ، پارک ، ہوٹل، ریسٹورنٹس سمیت صوبہ کی ثقافت اور تمام سہولیات کی معلومات باآسانی میسر ہونگی ، موبائل ایپ میں سیاحوں کو موسم کی صورتحال ، ہوٹلز کی بکنگ ، سیاحتی مقامات ، جھیلیں ، ٹریکنگ ، راستوں کی تفصیلات ، تصاویر ، ویڈیوز ، ایمرجنسی معلومات ، مستقبل میں ہونے والے ایونٹس سمیت تمام تر معلومات فراہم کی جائینگی ،سینئر صوبائی وزیر عاطف خان نے محکمہ سیاحت اور ذیلی اداروں کو جدید خطوط پر استوار کرنے کا عزم کیا ہے اور یہ عالمی یوم سیاحت کے اس سال کے سلوگن کے مطابق ایک اہم قدم ہے جسے جلد از جلد مکمل کیا جائے ۔
