اسلام آباد (مانیٹرنگ ڈیسک) سابق کرکٹ کھلاڑی وقار یونس، انضمام الحق اور مشتاق احمد نے ایک نجی ٹی وی چینل کے پروگرام میں معروف صحافی حامد میر کو دورہ آسٹریلیا کے دوران پیش آنے والا ایک دلچسپ واقعہ سنایا، واقعہ سناتے ہوئے معروف کرکٹر و سابق کوچ وقار یونس نے کہا کہ غیر ملکی دورے کے دوران زندگی میں پہلی مرتبہ پیزا کھانے عمران خان کی سربراہی میں گئے تو جب پیزا کھانے کے بعد بل آیا تو میری سوچ کے برعکس سب کو پیسے دینے پڑے، اس موقع پر مشتاق احمد نے مداخلت کرتے ہوئے بتایا کہ
مجھے اچھی طرح یاد ہے جب بل آیا تو عمران خان نے بل دیکھ کر کہا کہ میرے حصے میں یہ 15 ڈالر آئے ہیں آپ اپنے حصے کے پیسے اس میں شامل کریں اور بل ادا کرکے آ جائیں، انہوں نے یہ کہا اور وہ سے چلے گئے۔ اس موقع پر معروف صحافی حامد میر نے کہا کہ اس کا مطلب ہے کہ عمران خان نے آپ کو بہت اچھی عادتیں ڈالی ہیں جس پر انہوں نے کہا کہ بالکل درست بات ہے کیونکہ ہم اس کے بعد سے تمام کام پیسے ملا کر ہی کرتے ہیں، آپ کے پروگرام میں آنے سے قبل وقار یونس نے میری گاڑی میں پٹرول ڈلوایا ہے۔
