اسلام آباد(آن لائن) پیپلزپارٹی کے رہنما و سینٹر رحمان ملک نے کہا ہے کہ اگر پی ٹی آئی اپوزیشن کو ساتھ لے کر چلنا چاہتی ہے تو ان کو الزامات اور گالی کی سیاست کو ختم کرنا ہوگا قوم کی حالت بدلنے میں اگر پی ٹی آئی نے کردار ادا کیا تو ہم ان کا بھرپور ساتھ دیں گے۔ قومی اسمبلی کے پہلے اجلاس میں آمد کی موقع پر صحافیوں سے گفتگو کرتے ہوئے رحمان ملک نے کہا کہ قوم یہ نہیں چاہتی کہ عمران خان کہاں رہیں گے
اور کہاں سوئیں گے۔ قوم یہ چاہتی ہے کہ ملک میں قانونکی عملداری ہواور قوم کی حالت بدلنے کیلئے جو انہوں نے وعدے کیے ہیں ان کو پورا کیا جائے اگر پی ٹی آئی کی حکومت ایک سال میں قوم کی حالت بدلنے میں کامیاب ہوگی تو ہم ان کا بھرپور ساتھ دیں گے عمران خان اگر اپوزیشن کو ساتھ لے کر چلنا چاہتے ہیں تو انہیں گالی اور الزامات کی سیاست کو ترک کرنا پڑے گا اور قوم کی ایک پلیٹ فارم پر اکٹھا کرکے ایک عظیم قوم بنانا ہوگا ۔انہوں نے مزید کہا کہ ملک کو اس وقت بیرونی اور اندورنی دونوں ملک دشمن عناصر سے خطرات لاحق ہیں ۔نریندر مودی افغانستان میں داعش اور طالبان کو فروغ دے رہا ہے اور ’’را‘‘ کے تحت بلوچستان اور گلگت میں دہشت گردی کروا رہا ہے ہمیں ان تمام چیلنجز کو مل کر مقابلہ کرنے کی ضرورت ہے ایک سوال کے جواب میں انہوں نے کہا کہ تحریک انصاف قومی عمارتوں کو اسکریپ نہ کریں گورنر ہاؤس سندھ میں قائد اعظم محمد علی جناح کا پانچ کمروں پر مشتمل دفتر ہے اس کو ہم مسمار نہیں کرنے دیں گے۔
