ممبئی (این این آئی) بالی وڈ کی آنجہانی اداکارہ سری دیوی کی دبئی میں رکنے کی وجہ سامنے آگئی۔ اداکارہ اپنی پینٹنگز کی نیلامی کی وجہ سے وہاں رکی تھیں۔ بالی وڈ کی چاندنی سری دیوی اداکاری کے ساتھ فارغ وقت میں پینٹنگز کرتی تھیں۔انہوں نے اداکارہ سونم کپور اور مائیکل جیکسن کی پینٹنگز بنائیں۔ بھارتی میڈیا کے مطابق دبئی میں ان کے رکنے کی وجہ ان کی پینٹنگز کی نیلامی تھی۔ آئندہ ماہ ہونے والی اس نیلامی میں ان کی بنائی
سونم کپور کی پینٹنگ دس لاکھ تک فروخت ہونے کی توقع ہے جبکہ مائیکل جیکسن کی پینٹنگ کی ابتدائی قیمت آٹھ لاکھ لگائی گئی ہے۔دریں اثنا پاکستانی اداکارہ سجل علی نے آنجہانی اداکارہ سری دیوی کا ان کیلئے آخری پیغام مداحوں کے ساتھ شیئر کیا ہے۔بالی ووڈ فلم’’موم‘‘میں سری دیوی کی بیٹی کا کردار اداکرنے والی پاکستانی اداکارہ سجل علی حقیقت میں سری دیوی کو اپنی ماں کا درجہ دیتی تھیں وہ ابھی تک اس صدمے سے باہر نہیں نکل سکی ہیں کہ سری دیوی انہیں چھوڑ کر چلی گئیں، سری دیوی کی موت پر سجل علی نے اپنے تاثرات کا اظہار کرتے ہوئے کہا تھا ’’مجھے ایسا لگ رہا ہے جیسے میں نے ایک بار پھر اپنی ماں کو کھودیا‘‘۔بھارتی میڈیا کے مطابق حال میں دئیے گئے انٹرویو میں سجل علی نے ایک بار پھر سری دیوی کے ساتھ اپنی یادیں شیئر کرتے ہوئے کہا ہے کہ سری دیوی مجھے اکثر فون کرتی تھیں اور ملنے کا پروگرام بناتی تھیں۔ گزشتہ برس دبئی میں منعقد ہونیوالے مسالا ایوارڈ میں میں مصروفیت کی بنا پر شرکت نہیں کرسکی تھی اور ہم مل نہیں سکے تھے جس کے بعد انہوں نے مجھے پیغام بھیجا تھا ’’میں تمہیں بہت یاد کرتی ہوں بیٹا‘‘۔ یہ سری دیوی کا میرے لیے آخری پیغام تھا۔سجل علی نے افسوسناک لہجے میں بتاتے ہوئے کہا کچھ دن قبل سری دیوی نے مجھے فون کیا تھا لیکن میں شوٹنگ میں مصروف ہونے کی وجہ سے ان کا فون نہیں سن سکی تاہم میں نے انہیں دوبارہ کال کرنے کا سوچا لیکن بدقسمتی سے ہماری بات نہیں ہوسکی۔واضح رہے کہ سجل علی نے فلم’’موم‘‘کے دوران اپنی والدہ کو کھودیا تھا
اس وقت سری دیوی نے انہیں حوصلہ دیتے ہوئیگلے لگایا تھا اور کہا تھا وہ صرف فلم میں میری ماں نہیں ہیں بلکہ اصل زندگی میں بھی میری ماں ہیں۔قبل ازیں بھارتی فلم انڈسٹری کی لیجنڈری اداکارہ سری دیوی صرف دل سے امیر نہیں تھیں بلکہ ان کے پاس اچھی خاصی جائیداد بھی تھی۔24 فروری کو اپنے گھروالوں سمیت مداحوں کو سوگوار چھوڑ کر ہمیشہ کیلئے اس دنیا سے رخصت ہونے والی آنجہانی اداکارہ سری دیوی کی موت کا ان کے چاہنے والوں کو اب بھی یقین نہیں ہورہا ہے۔
سری دیوی کا شمار بالی ووڈ کی سب سے زیادہ معاوضہ لینے والی اداکاراؤں میں ہوتا تھا جب کہ کئی بار انہوں نے فلموں میں ہیرو کے مقابلے میں بھی زیادہ معاوضہ حاصل کیا۔ سری دیوی نے اداکارہ کے علاوہ بطور ماڈل بھی کام کیا جب کہ وہ فلم پروڈیوسر بھی رہ چکی تھیں۔بھارتی میڈیا کے مطابق سری دیوی کی 2012 میں ریلیز ہونے والی فلم’’انگلش ونگلش‘‘کے بعد ان کی سالانہ آمدنی 13 کروڑ روپے تھی جب کہ ان کی کل آمدنی247 کروڑ تھی
جس میں ان کے پرتعیش بنگلے اور مہنگی کاریں بھی شامل ہیں۔ سری دیوی کے پاس7 کاریں تھیں جن کی قیمت مجموعی طور پر 9 کروڑ تھی جن میں دو بینٹلی، اوڈیز اورفورڈز کاریں شامل ہیں۔ اس کے علاوہ ان کے پاس 3 خوبصورت بنگلے تھے۔ سری دیوی بالی ووڈ کی وہ پہلی سپر اسٹار تھیں جنہوں نے فلم میں کام کرنے کا معاوضہ ایک کروڑ روپے وصول کیا تھا۔ 1985 سے 1992 تک وہ بالی ووڈ میں سب سے زیادہ معاوضہ حاصل کرنے والی اداکارہ تھیں۔
اس کے علاوہ سری دیوی وہ پہلی اداکارہ تھیں جنہوں نے اپنے لیے وینیٹی وین بنوائی جس کے بعد یہ ٹرینڈ چل پڑا اور آج تقریباً ہر اداکار کے پاس اپنی وینیٹی وین ہے۔ میڈیا رپورٹس کے مطابق سری دیوی کی موت کے بعد ان کی جائیداد ان کی دونوں بیٹیوں خوشی اور جھانوی کپور کو منتقل کی جائے گی جبکہ ان کے شوہر بونی کپور اس میں حصے دار نہیں ہوں گے۔
