کراچی (این این آئی)پاکستانی اداکار احسن خان اور اداکارہ نیلم منیر کی ایک سحرا میں موجود تصاویر سوشل میڈیا پر وائرل ہورہی ہیں، یہ تصاویر ان کے نئے پروجیکٹ ’چھپن چھپائی‘ کی ہیں، جس کی شوٹنگ جوش و خروش سے جارہی ہے۔لیکن آخر یہ فلم ہے کس موضوع پر؟ کیوں نام سے تو یہ چھپنے اور پکڑنے کی کہانی لگتی ہے۔فلم کے مرکزی اداکار احسن خان نے اپنے ایک انٹرویو میں اپنی فلم کے حوالے سے بتاتے ہوئے کہا کہ ’چھپن چھپائی
کا اسکرپٹ نوجوانوں کو مدنظر رکھتے ہوئے تیار کیا گیا، یہ ایک کامیڈی تھرلر فلم ہے، جس کی کہانی بے روزگار نوجوانوں کے گرد گھومتی ہے جو جلدی پیسے کمانا چاہتے ہیں، اس کے لیے وہ غنڈا گردی کرنے کے ساتھ ساتھ لوگوں کو اغواء بھی کرتے ہیں، لیکن ظاہر ہے آخر میں انہیں اس کے نتائج کا سامنا بھی کرنا پڑتا ہے۔انہوں نے مزید کہا کہ اس فلم کی کہانی ’گول مال‘، ’نامعلوم افراد‘ یا ’رانگ نمبر‘ جیسی ہی ہے۔اس فلم کی کہانی محسن علی نے تحریر کی، جبکہ احسن خان کے نیشنل اکیڈمی آف پرفارمنگ آرٹس (ناپا) کے دوست زید شیخ اس فلم کی پروڈکشن کررہے ہیں، فلم میں وجدان اور علی رضوی نامی اداکار بھی کام کرتے نظر آئیں گے، اور احسن خان کا اس حوالے سے کہنا تھا کہ وہ انڈسٹری میں آنے والے نے لوگوں کو سپورٹ کرنا چاہتے ہیں۔احسن کا اس حوالے سے کہنا تھا کہ ’ناپا وہ واحد اسٹیٹیوٹ ہے جہاں سے کافی قابل اداکار اور ہدایت کار سامنے آرہے ہیں، فلم چھپن چھپائی کی ٹیم بھی اس ہی اسٹیٹیوٹ کی ہے، اور مجھے لگا کہ اگر لوگوں کو فلم میں میری موجودگی سے کوئی فائدہ ہوسکتا ہے تو پھر میں انہیں ضرور سپورٹ کروں گا، ہمیں اس فیلڈ میں موجود نئے لوگوں کو سپورٹ کرنا چاہیے۔اس فلم میں نیلم منیر بھی اہم کردار ادا کررہی ہیں، جبکہ ناپا سے تعلق رکھنے والے معروف اداکار طلت حسین، ارشد محمود اور عدنان جعفر بھی فلم میں موجود ہیں۔اس فلم کی موسیقی جوش بینڈ ترتیب دے رہے ہیں۔
