ممبئی (این این آئی)بالی ووڈ کی کئی فلموں میں متاثر کن اداکاری سے اپنا ایک منفرد مقام بنانے والی اداکارہ ’تبو‘ 46 برس کی ہوگئیں۔مشہور اداکارہ شبانہ اعظمی کی بھتیجی تبسم ہاشمی4 نومبر 1971 کو بھارتی شہر حیدرآباد میں پیدا ہوئیں ٗ1983 میں اعلیٰ تعلیم کیلئے ممبئی آئیں اور اپنی بہن فرح ناز کے نقش قدم پر چلتے
ہوئے بھارتی فلم انڈسٹری میں قدم رکھا۔تبو نے 15 سال کی عمر میں فلم ہم نوجوان میں مختصر کردار کے ساتھ کیرئیر کا آغاز کیا ٗ پہلی بار تبو نے بونی کپور کی فلم پریم میں سنجے کپور کے ساتھ مرکزی کردار ادا کیا اور بہت جلد اپنی شاندار اداکاری کی بدولت انڈسٹری پر چھا گئیں۔اجے دیوگن کے ساتھ فلم وجے پتھ میں بے مثال
اداکاری پر تبو کو فلم فئیر ایوارڈ بھی دیا گیا، ان کی دیگر یادگار فلموں میں ساجن چلے سسرال، جیت، بارڈر، وراثت، بیوی نمبر ون، ہم ساتھ ساتھ ہیں، ہیرا پھیری، چینی کم، بندہ یہ بنداس ہے اور درشیم شامل ہیں۔ماچس، وراثت اور چاندنی بار کو بھی تبو نے اپنی متاثر کن اداکاری سے مقبول بنایا اور بھارت کے چوتھے بڑے سویلین اعزاز پدما شری سمیت کئی اعزازات پائے۔
