ممبئی (این این آئی) بالی ووڈ کی فلم ’’راجو چاچا‘‘ ریلیز سے پہلے ہی میڈیا میں شہہ سرخیوں کی زینت بن گئی تھی کیونکہ اس کی وجہ وہ کثیر لاگت تھی جو ان دنوں اس فلم پر لگائی گئی تھی۔ اجے دیوگن کی پوم پروڈیکشن میں بننے والی اس فلم سے بہت امیدیں وابستہ کی گئیں لیکن ’’راجو چاچا‘‘ فلم بینوں کو اپنی طرف راغب کرنے میں ناکام رہی اور باکس آفس پر بری طرح پٹ گئی۔ لیکن اس فلم میں ایک ایسی چائلڈ ایکٹریس بھی تھی جس نے اپنی معصوم اداکاری سے فلم دیکھنے
والوں کو بہت محظوظ کیا اور خوب داد سمیٹی۔ساکشی نامی اس چائلڈ ایکٹریس نے ’’راجو چاچا‘‘ میں رشی کپور کی بیٹی کا کردار بہت خوبی سے نبھایا تھا۔ اس کے بعد ساکشی سم نے کچھ اور فلموں میں بھی اداکاری کی لیکن زیادہ تر ٹیلی وژن کمرشلز میں ہی نظر آئی۔ کچھ عرصہ بعد یہ اداکارہ پردہ سکرین سے ایسے غائب ہوئی کہ دوبارہ کبھی نظر نہیں آئی لیکن ہم اپنے قارئین کیلئے اسے ڈھونڈ لائے ہیں۔ ساکشی سم نے 2015ء میں ریلیز کی گئی فلم رہسیے میں بھی اہم کردار ادا کیا تھا۔
