پشاور(این این آئی) خیبر پختونخوا کے محکمہ جنگلی حیات نے بولی وڈ کے کنگ شاہ رخ خان کے لیے ہرن کی کھال سے خصوصی طور پر چپل تیار کرنے والے شخص کو گرفتار کرلیا۔ نجی ٹی وی کے مطابق شاہ رخ خان کی کزن نور جہاں نے اداکار کیلئے مسلم لیگ (ن) کے کارکن اور پشاوری چپلوں کے مشہور کاریگر جہانگیر خان کو چپل کے 2 جوڑے تیار کرنے کا آرڈر دیا تھا۔جہانگیر نے وہ 2 جوڑے تو تیار کیے تاہم ساتھ ہی شاہ رخ خان سے اپنی محبت کے اظہار کیلئے تحفے کے طور پر ہرن کی کھال سے خصوصی چپل کی ایک اضافی جوڑی بھی تیار کی۔ہرن کی کھال سے چپل تیار کرنے پر خیبر پختونخوا کا محکمہ جنگلی حیات حرکت میں آیا اور اس کی ٹیم نے چھاپہ مار کر جہانگیر خان کو گرفتار کرلیا اور ہرن کی کھال سے بنی چپل کی جوڑی بھی اپنے قبضے میں لے لی۔واضح رہے کہ صوبہ خیبر پختونخوا میں ہرن کے شکار اور اس کی کھال کی خرید و فروخت پر پابندی ہے۔جہانگیر خان اس سے قبل وزیر اعظم نواز شریف کیلئے بھی شیر کی کھال سے پشاوری چپل تیار کر چکے ہیں۔شاہ رخ خان کیلئے پشاوری چپل کا آرڈر دینے کے بعد ان کی کزن نور جہاں نے بتایا تھا کہ اداکار کی خصوصی فرمائش پر انہوں نے ان چپلوں کا آرڈر دیا۔انہوں نے کہاکہ انہوں نے 1997 میں بھی شاہ رخ خان کو پشاوری چپل کا تحفہ دیا تھا اور وہ بھارت جاکر دوبارہ انہیں ان چپلوں کا تحفہ دیں گی۔