ممبئی (این این آئی) بالی ووڈ ایکشن ہیرو جان ابراہم اپنی فلم ’فورس ‘ کی شوٹنگ کے دوران شدیدزخمی ہوگئے جنہیں فوری طور پر ہسپتال منتقل کردیا گیا۔ بھارتی میڈیا کے مطابق جان ابراہم آج کل اپنی نئی فلم فورس 2 کی شوٹنگ میں مصروف ہیں ، شوٹنگ کے دوران ایکشن سین کرتے ہوئے اداکار کے پیر میں شدید چوٹ آئی جس کے بعد انہیں ہسپتال منتقل کردیا گیا۔ فورس 2 کے پروڈیوسر وپول شاہ نے کہا ہے کہ جان ابراہم ایکشن سین کو فلمانے کے دوران زخمی ہوئے ہیں، اداکار نے سین تو مکمل کر لیا ہے مگر انہیں اس میں شدید تکلیف کا سامنا کرنا پڑا، انہوں نے کہا کہ اداکار تین دن تک فلم کی شوٹنگ مکمل نہیں کر پائینگے، انہوں نے کہا کہ فلم کی تقریبا 80 فیصد شوٹنگ مکمل ہوچکی ہے تاہم بقیہ سین بعد میں فلمائے جائینگے۔