لاہور( این این آئی)بھارتی گلوکار سکھ بیر سنگھ لاہور ائیر پورٹ پر 27ہزار امریکی ڈالر برآمد ہونے کے بعد کسٹم حکام کو چکمہ دے کر فرار ہو گئے ،وفاقی حکومت نے بھارتی گلوکار سے ڈالر برآمد ہونے اور کسٹم حکام کی تحویل سے فرار ہونے کا نوٹس لے لیا ۔نجی ٹی وی کے مطابق بھارتی گلوکار سکھ بیر سنگھ گزشتہ روز پی کے 203سے لاہور سے دبئی جانے کےلئے ائیر پورٹ پہنچے ۔سامان کی تلاشی کے دوران ان سے 27ہزار امریکی ڈالر برآمد ہونے پر کسٹم حکام کے حوالے کر دیا گیا تاہم اسی دوران بھارتی گلوکار چکمہ دے کر فرار ہو گئے ۔ بتایا گیا ہے کہ وفاقی حکومت نے بھارتی گلوکار سے ڈالر برآمد ہونے اور کسٹم حکام کی تحویل سے سکھ بیر سنگھ کے فرار کا نوٹس لے لیا ۔