لاہور (نیوز ڈیسک)پاکستان کے نامور قوال امجد صابری نے بالی ووڈ فلم بجرنگی بھائی جان میں بغیر اجازت کے قوالی ریکارڈ کرانے پر اداکار سلمان خان کے خلاف عدالت میں درخواست تو پہلے سے ہی دائرکر رکھی ہے اور اب انہوں نے بھارتی عدالت کی جانب سے طلب کئے جانے پربھارتی ویزے کیلئے درخواست بھی دائر کردی ہے۔اس فلم میں مرحوم قوال صابری برادران کی قوالی ” بھر دو جھولی” کو شامل کیا گیا ہے۔ امجد صابری کا کہنا تھا کہ سلمان خان فلمز نے فلم بجرنگی بھائی جان میں بغیر اجازت کے قوالی “بھردو جھولی میری یا محمد”شامل کی جس پر ان کے خلاف بھارت کی عدالت میں درخواست دائر کروائی تھی۔ اب عدالت کی جانب سے نوٹس ملا ہے کہ وہ اس قوالی کو اپنی خاندانی ملکیت ثابت کریں۔ امجد صابری کے مطابق یہ ثابت کرنے کیلئے وہ بھارت جائیں گے اور اس کیلئے بھارتی ویزے کی درخواست دائر کی ہے۔ بجرنگی بھائی جان میں یہ قوالی عدنان سمیع خان نے گائی اورسلمان خان پرپکچرائز کی گئی۔ امجد صابری کے علاوہ اس قوالی کو ریلیز کرنے والے ادارے ای ایم آئی پاکستان نے بھی فلم پروڈیوسرز کیخلاف درخواست دائر کر رکھی ہے۔