ممبئی(نیوز ڈیسک) بالی ووڈ اداکارہ ہیما مالنی نے 2 جولائی کو ہونے والے کارحادثے میں ایک چار سالہ بچی کی ہلاکت کا ذمہ دار اس کے والد کو قرار دے دیا۔ 2 جولائی کو راجستھان میں جے پور کے قریب ہیما مالنی کی مرسڈیز کار ایک آلٹو سے ٹکرا گئی تھی جس میں آلٹو میں سوار چار سالہ بچی سونم چل بسی۔ ہیما مالنے کی پیشانی پر گہرا زخم آیا تھا۔ ہیما مالنی نے ٹوئٹر کے ذریعے بچی کی موت پر دکھ کا اظہار کیا اور ساتھ ہی اس کے والد کو ہی اس حادثے کا ذمہ دار ٹھہرا دیا۔ ہیما نے لکھا کہ اگر بچی کا والد ٹریفک قوانین کی خلاف ورزی نہ کرتا تو یہ حادثہ پیش نہ آتا، بچی کی زندگی بچائی جا سکتی تھی۔ انہوں نے کہا کہ وہ اس بچی اور اس کے خاندان کیلئے بہت دکھی ہے ۔