واشنگٹن ( آن لائن) مائیکرو سافٹ کمپنی کے مالک بل گیٹس نے کہا ہے کہ کورونا وائرس کے پھیلاومیں اْن کا کوئی کردار نہیں ہے۔ امریکی نشریاتی ادارے کو دیے گئے ایک انٹرویو میں بل گیٹس نے کہا کہ کوروناکے پھیلنے کے بعد سوشل میڈیا پر ان کے متعلق طرح طرح کی باتیں کی جا رہی ہیں اور سازشی نظریات کا ایک طویل سلسلہ جاری ہے اورمتعدد زبانوں میں پیغام رسانی کے لیے استعمال کی جانے والی ایپس کے ذریعے اْنہیں تنقید کا نشانہ بنایا جا رہا ہے کہ بل گیٹسویکسینیشن اور الیکٹرانک مائیکرو چپس کے ذریعے دنیا کی 15
فی صد آبادی کو ختم کرنا چاہتے ہیں۔انہوں نے اس الزام کی تردید کرتے ہوئے کہا کہ بل گیٹس فاؤنڈیشن نے دنیا میں کسی بھی دوسرے ادارے کے مقابلے میں موذی امراض کی ویکسین خریدنے کے لیے زیادہ رقم ادا کی ہے تاکہ مریضوں کی جان بچائی جا سکے۔ انہوں نے مزید بتایا کہ بل گیٹس فاونڈیشن گزشتہ 20 برسوں سے ترقی پذیر ممالک کے عوام کی صحت کو بہتر بنانے کے لیے مسلسل کروڑوں ڈالرز خرچ کر چکی ہے۔