چین(مانیٹرنگ ڈیسک ) شیاﺅمی نے اپنے میجیا کراؤڈ فنڈنگ پلیٹ فارم سے می ہوم پراجیکٹر لائٹ (یوتھ ایڈیشن) کو متعارف کرانے کا اعلان کیا جو کہ فی الحال صرف چین میں دستیاب ہوگا تاہم مستقبل قریب میں پاکستان میں بھی دستیابی کا امکان ہے۔ شیاﺅمی کا یہ ہوم پراجیکٹر کافی چھوٹا ہے۔
جس چوڑائی محض 15 سینٹی میٹر اور وزن 1.3 کلوگرام ہے۔ بنیادی طور پر یہ پراجیکٹر کسی 50 انچ کے ایل سی ڈی یا ایل ای ڈی ٹی وی سے کافی سستا ہے اور دیوار کو ہی ٹیلیویژن بنادیتا ہے۔ یہ پراجیکٹر 500 اے این ایس آئی لیومین لیمپ سے لیس ہے اور 1080p ریزولوشن پراجیکٹ کرسکتا ہے جبکہ ایچ ڈی آر 10 سپورٹ بھی دی گئی ہے۔ یہ ننھا پراجیکٹر 40 انچ اسکرین سائز کو پراجیکٹ کرسکتا ہے۔ چینی سوشل میڈیا سائٹ ویبو پر شیاﺅمی نے دعویٰ کیا کہ اس ہوم پراجیکٹر میں نصب ایل ای ڈی لیمپ 30 ہزار گھنٹے تک چل سکتا ہے جبکہ اس میں موجود اسپیکرز ڈولبی ایٹموس کے ساتھ ساتھ ڈی ٹی ایس سپورٹ رکھتے ہیں۔ پراجیکٹر میں یو ایس بی، ایچ ایم آئی پورٹس موجود ہیں جبکہ ایک اے یو ایکس پورٹ بھی ہے جو دیگر مصنوعات کو کنکٹ کرنے کے لیے استعمال ہوسکتی ہے۔ اس پراجیکٹر میں ایم آئی یو آئی ٹی وی آپریٹنگ سسٹم دیا گیا ہے جس کی بدولت یہ ٹی وی شو اور فلموں کو اسٹریم کرنے کی صلاحیت بھی رکھتا ہے۔ اور ہاں اس میں اے آئی وائس کنٹرول سیٹ اپ بھی دیا گیا ہے اور اسے ریموٹ کنٹرول کے بغیر بھی کنٹرول کرنا ممکن ہے۔ اس کی قیمت کراؤڈ فنڈنگ پلیٹ فارم پر 2 ہزار 199 چینی یوآن (44 ہزار پاکستانی روپے) رکھی گئی ہے، تاہم اس کی ریٹیل قیمت ڈھائی ہزار یوآن (50 ہزار پاکستانی روپے سے زائد) ہوگی۔
