ہرارے (این این آئی) سائنسدان کچھ اس طرح کا تجربہ کر رہے ہیں جس کی مدد سے وہ اینٹی بائیوٹکس کے بجائے شکر سے زخموں کو بھرنے کی کوشش کر رہے ہیں اور انھیں اس سمت میں کامیابی بھی نظر آئی ہے۔غیرملکی خبررساں ادارے کے مطابق زمبابوے کے موزز مرانڈو برطانیہ میں نرسنگ کا کام کرتے ہیں اور انھوں نے ہی زور شور سے زخم بھرنے کے لیے اینٹی بایوٹکس کی جگہ شکر کے استعمال کی مہم شروع کر رکھی ہے۔

انہوں نے کہاکہ بچپن میں جب دوڑنے یا کھیلنے کے دوران انھیں چوٹ آتی تھی تو ان کے والد ان کے زخموں پر نمک ڈال دیتے تھے۔ لیکن جب ان کے پاس پیسے ہوتے تو وہ نمک کے بجائے زخم پر شکر ڈال دیا کرتے تھے۔انہو ں نے کہاکہ مجھے اب بھی یاد ہے چینی ڈالنے سے زخم جلد بھر جایا کرتے تھے۔بعد میں موزز مرانڈو کو 1997 میں برطانیہ کے نیشنل ہیلتھ میں نرس کے طور پر ملازمت ملی جہاں انھوں نے محسوس کیا کہ زخم بھرنے کے لیے چینی کا استعمال نہیں کیا جاتا جس کے بعد انھوں نے زخموں کو بھرنے کے لیے چینی یعنی شکر کے استعمال کا فیصلہ کیا۔مرانڈو کے ابتدائی تجربات کامیاب تھے اور اب اینٹی بایوٹکس کی جگہ چینی کے استعمال کی ان کی تجویز کو سنجیدگی سے لے لیا جا رہا ہے۔انھوں نے برطانیہ کی وولور ہیمپٹن یونیورسٹی میں زخم بھرنے میں شکر کے کردار پر تحقیق کی اور اس کے لیے گذشتہ ماہ انھیں ایوارڈ دیا گیا۔