اسلام آباد (نیوز ڈیسک )آڈی پاکستان نے الیکٹرک گاڑیوں کے شوقین صارفین کے لیے ایک اور جدید ماڈل متعارف کرا دیا ہے۔ ای ٹران 50 اور ای ٹران جی ٹی کی کامیابی کے بعد اب آڈی کیو 6 ای ٹران باقاعدہ طور پر پاکستانی مارکیٹ میں پیش کر دی گئی ہے۔یہ نئی برقی ایس یو وی آڈی کے جدید ترین الیکٹرک پلیٹ فارم پر تیار کی گئی ہے، جو شاندار ڈیزائن اور طاقتور کارکردگی کا حسین امتزاج پیش کرتی ہے۔ گاڑی کا مضبوط باڈی اسٹرکچر اور چوڑا فرنٹ ڈیزائن اسے انتہائی دلکش بناتا ہے۔ اس ماڈل کی ایک نمایاں خصوصیت دنیا میں پہلی بار متعارف کروائی جانے والی ڈیجیٹل لائٹ سگنیچر ٹیکنالوجی ہے، جس کے ذریعے صارفین لائٹس کے ڈیزائن کو اپنی پسند کے مطابق تبدیل کر سکتے ہیں۔

کیبن کے اندر داخل ہوں تو آرام اور جدید سہولیات کا امتزاج فوراً محسوس ہوتا ہے۔ وسیع اسکرینز پر مشتمل ڈیش بورڈ اور اینڈرائیڈ بیسڈ انفوٹینمنٹ سسٹم گاڑی کے استعمال کو نہایت سہل بناتے ہیں۔ طویل سفر کے دوران مسافروں کے سکون کے لیے نشستوں میں مساج فیچر بھی فراہم کیا گیا ہے۔کارکردگی کے لحاظ سے آڈی کیو 6 ای ٹران 456 ہارس پاور پیدا کرنے کی صلاحیت رکھتی ہے اور اس میں 225 کلو واٹ آور کی دو بیٹریاں نصب ہیں، جو ایک بار مکمل چارج ہونے پر تقریباً 625 کلومیٹر تک سفر ممکن بناتی ہیں۔اس کے ساتھ فاسٹ چارجنگ سہولت کے ذریعے گاڑی صرف 21 منٹ میں 10 سے 80 فیصد تک چارج ہو جاتی ہے۔ حفاظت اور سہولت کے لیے خودکار ایمرجنسی بریک، لین اسسٹ سسٹم اور 360 ڈگری کیمروں جیسے جدید فیچرز بھی اس ماڈل کا حصہ ہیں۔