اسلام آباد (نیو ز ڈیسک) ٹیکنالوجی کی دنیا کے بے تاج بادشاہ گوگل نے اعلان کیا ہے کہ وہ ایسے مصنوعی ریشے کو تیار کرنے کی کوشش کررہا ہے جس کی مدد سے تیار کئے گئے کپڑے کمپیوٹر کا کام دیں گے۔ یہ اعلان گوگل نے اپنی سالانہ ڈیولپرز کانفرنس کے موقع پر کیا ہے۔ اس منصوبے کا نام ”پروجیکٹ جیکوارڈ“ رکھا گیا ہے۔ جیکاورڈ لوم وہ فرانسیسی جولاہا تھا جس نے ٹیکسٹائل انڈسٹری میں جدید اصلاحات متعارف کروائیں اور یہاں جدید دور کی کمپیوٹر ٹیکنالوجی کے استعمال کو ممکن بنایا۔ گوگل کا تیار کردہا کپڑا موبائل سکرین پر انسانی ٹچ کو محسوس کرنے کی مانند صلاحیت کا حامل ہوگا۔ اسے مخصوص انداز میں چھونے سے مخصوص احکامات دیئے جاسکیں گے۔ یہ ٹیبلٹ کمپیوٹرز اور سمارٹ فونز سے کنیکٹ بھی ہوسکے گا جس کی وجہ سے ٹیبلٹ کمپیوٹرز وغیرہ کو ہر وقت ہاتھ میں تھامے رہنے کی ضرورت نہ ہوگی۔ اس کپڑے کا ریشہ کنڈکٹیو اور درجنوں رنگوں میں دستیاب ہے جس کی وجہ سے یہ کپڑوں کی بنائی کے جدید طریقے سے ہم آہنگ ہے۔ اس ریشے سے کپڑا انہی کھڈیوں پر تیار کیا جاسکتا ہے جس پر عام ریشے سے کپڑا بنا جاتا ہے۔
اس مقصد کیلئے گوگل نے لیوی سٹراس سے پارٹنر شپ قائم کی ہے تاکہ ایسی ٹیکنالوجی تیار کی جاسکے کہ محض جیکٹ کا ایک کف سوائپ کرنے سے کسی بھی شخص کو پیغام ارسال کیا جاسکے۔ دونوں کمپنیز کو امید ہے کہ وہ اس سلسلے میں آئندہ برس تک دنیا کو خوشخبری سنا سکیں گے تاہم اس کپڑے کی ساخت کیا ہوگی اور قیمتاً کیسا ہوگا، اس بارے میں کمپنیز نے کچھ بھی بتانے سے گریز کیا ہے۔ گوگل ایڈوانسڈ ٹیکنالوجیز اینڈ پروڈکٹ گروپ، گوگل کے اس منصوبے کا نام ہے جس کے تحت کمپنی نت نئے منصوبوں پر کام کرتی ہے اور جیکوارڈ پروجیکٹ بھی اسی منصوبے کے تحت متعارف کروایا گیا ہے۔