اسلام آباد (نیوز ڈ یسک)نادرا کے ریکارڈ میں پاکستانی شہریوں کے فیملی ٹری میں بڑی تعداد میں مشتبہ افراد کی شمولیت کا معاملہ سامنے آیا ہے۔

میڈیا رپورٹس کے مطابق جعلی دستاویزات کے ذریعے شناختی کارڈ حاصل کر کے فیملی ریکارڈ میں شامل ہونے والوں کے خلاف نادرا نے کارروائی کا آغاز کر دیا ہے اور ایسے افراد کو وضاحت کے لیے طلب کیا جا رہا ہے۔ابتدائی مرحلے میں ضلع راولپنڈی سے تعلق رکھنے والے 833 مشتبہ افراد کو نوٹس جاری کیے گئے ہیں جنہیں ہدایت کی گئی ہے کہ وہ سات دن کے اندر متعلقہ دفتر میں پیش ہو کر اپنا موقف پیش کریں۔ذرائع کے مطابق ان افراد پر الزام ہے کہ انہوں نے جعل سازی کے ذریعے پاکستانی شہریوں کے خاندانی ریکارڈ میں اپنا اندراج کروایا۔ انہیں فون کالز اور پیغامات کے ذریعے بھی مطلع کیا گیا ہے تاکہ سماعت کے دوران ان کا بیان لیا جا سکے۔

حکام کا کہنا ہے کہ اگر طلب کیے جانے کے باوجود کوئی فرد پیش نہ ہوا تو اس کی پاکستانی شہریت منسوخ کیے جانے کا امکان ہے۔