اسلام آباد (نیوز ڈ یسک)پنجاب بھر کے سرکاری تعلیمی اداروں میں اساتذہ کے لیے نیا پیشہ ورانہ لباس ضابطہ متعارف کرانے کا فیصلہ کر لیا گیا ہے،

جس پر عملدرآمد 23 فروری 2026 سے لازمی ہوگا۔ اس حوالے سے اسکول ایجوکیشن ڈیپارٹمنٹ نے باضابطہ نوٹیفکیشن جاری کر دیا ہے۔نئی ہدایات کے مطابق تدریسی اوقات میں تمام اساتذہ کو بلیک گاؤن پہننا ضروری قرار دیا گیا ہے، جسے تعلیمی وقار، پیشہ ورانہ شناخت اور نظم و ضبط کی علامت قرار دیا گیا ہے۔لباس کے دیگر تقاضوں میں مرد اساتذہ کے لیے ہلکے یا سادہ رنگوں کی شلوار قمیض یا پینٹ شرٹ کے ساتھ بند جوتے یا اسٹرپ والی سینڈل شامل ہیں، جبکہ خواتین اساتذہ کو بھی مناسب اور باوقار سینڈل یا بند جوتے پہننے کی ہدایت کی گئی ہے۔محکمہ تعلیم کا کہنا ہے کہ یہ ضابطہ تمام اساتذہ پر بلا امتیاز لاگو ہوگا، چاہے ان کا تعلق کسی بھی کیڈر، جنس یا علاقے سے ہو۔

اسکول سربراہان کو روزانہ کی بنیاد پر اس پر عملدرآمد یقینی بنانے کا پابند بنایا گیا ہے، جبکہ ڈسٹرکٹ ایجوکیشن افسران کو سخت نگرانی کے ذریعے اس پالیسی کو نافذ کرنے کی ہدایت کی گئی ہے۔ حکام کے مطابق اس اقدام سے تعلیمی اداروں میں یکسانیت، نظم و ضبط اور پیشہ ورانہ ماحول کو مزید بہتر بنانے میں مدد ملے گی۔