اسلام آباد(این این آئی)پاکستان تحریک انصاف کے سابق رہنما اور رکن قومی اسمبلی شیر افضل مروت نے کہا ہے کہ عمران خان سمیت پی ٹی آئی کے موناٹائزڈ سوشل میڈیا اکاؤنٹس کا کبھی آڈٹ نہیں ہوا، ان لوگوں نے قسط وار کہانیاں گڑھی ہوتی ہیں، جب مخالفین کے خلاف خبریں کم پڑجاتی ہیں تو اپنوں کے پیچھے پڑ جاتے ہیں، اداروں سے ٹکراؤ کی پالیسی، کردار کشی اور گالم گلوچ کے کلچرسے پی ٹی آئی کو رسوائی ملی۔ رکن قومی اسمبلی شیر افضل مروت پارٹی کی موجودہ حالت، سوشل میڈیا ٹیموں کے رویے اور قیادت کی غیر موجودگی پر سخت تنقید کرتے ہوئے کہا کہ پی ٹی آئی اس وقت انتشار کا شکار ہے اور اس حال میں بانی کی رہائی کا خواب دیکھنا محض ایک فریب ہے۔
شیر افضل مروت نے پی ٹی آئی کے سوشل میڈیا اکاؤنٹس پر تنقید کرتے ہوئے کہا کہ عمران خان کا اکاؤنٹ بھی موناٹائزڈ ہے، پی ٹی آئی کے موناٹائزڈ اکاؤنٹس کا کبھی آڈٹ نہیں ہوا، کئی لوگوں کی آنکھوں پر ڈالرز کی پٹی بندھی ہے، یہ لوگ سراسر جھوٹ بولتے ہیں۔رکن قومی اسمبلی نے مزید کہا کہ گالم گلوچ کے کلچر نے پی ٹی آئی کو رسوائی دی، ہماری شناخت ایک بدتمیز اور لڑائی جھگڑے والے گروہ کی بن گئی، اسی وجہ سے ہمیں انتشاری کہا جاتا ہے، ان لوگوں نے قسط وار کہانیاں گڑھی ہوتی ہیں، جب مخالفین کے خلاف خبریں کم پڑجاتی ہیں تو اپنوں کے پیچھے پڑ جاتے ہیں۔
شیر افضل مروت کا کہنا تھا کہ ہر لیڈر نے سوشل میڈیا ٹیم بنائی ہوئی ہے اور عثمانی جنگوں کی طرح جنگیں ہوتی ہیں، ایک دوسرے کے خلاف گالم گلوچ ہوتی ہے، کہاں گئی قیادت؟، کیا اتنا منتشر ہوکر یہ بانی چیئرمین پی ٹی آئی عمران خان کو رہا کرائیں گے؟ جو ایک سپاہی کے ڈنڈے کی وجہ سے گھر سے نہیں نکلتے، کیا یہ لوگ انقلاب لائیں گے؟ یہ نظر بھی نہیں آئیں گے، پی ٹی آئی کے پاس عمران خان کی رہائی کے لیے کوئی لائحہ عمل نہیں ہے۔
