کراچی(این این آئی)ملزم کامران قریشی نے ویڈیو بیان میں اپنے بیٹے ارمغان کو سزا دینے کا مطالبہ کردیا، پولیس حراست میں مصطفی قتل کیس کے مرکزی ملزم ارمغان کے والد کامران قریشی کا ابتدائی ویڈیو بیان منظرعام پر آگیاہے۔ ملزم کامران قریشی نے مرحوم مصطفی عامر کے والدین سے بھی معافیاں مانگنا شروع کردیں۔

تفصیلات مصطفی عامرقتل کیس میں گرفتار ملزم ارمغان کے والد ملزم کامران قریشی نے پولیس حراست میں ابتدائی بیان دیا جس میں ملزم کامران قریشی نے اپنے بیٹے ارمغان کو سزا دینے کا مطالبہ کیا ہے۔گرفتار ملزم کامران قریشی نے ابتدائی بیان میں کہا کہ میں غصے میں پاگل ہو جاتا تھا، سچ کی تلاش میں نکل پڑتا تھا، اب آہستہ آہستہ سچ پتا لگ رہا ہے۔کامران قریشی نے بیان میں بتایا کہ اگر بیٹے نے قتل کیا ہے تو قانون کے مطابق سزا ملنی چاہئے۔پولیس حراست میں گرفتار ملزم کامران قریشی نے مرحوم مصطفی عامر کے والدین سے بھی معافیاں مانگنا شروع کردیں، کہا کہ وجہیہ صاحبہ اور ان کے شوہر کی دل آزاری پر، آئی ایم سوری۔