واشنگٹن(این این آئی) امریکی صدر ڈونلڈ ٹرمپ کے مشیر اور دنیا کے امیر ترین شخص، ایلون مسک کیلئے 2025 کا مالی سال کچھ زیادہ اچھا ثابت نہیں ہو رہا، رواں سال اب تک ان کی دولت میں 132 ارب ڈالرز کی کمی ہو چکی ہے۔غیرملکی خبررساں ادارے کے مطابق 10 مارچ کو ٹیسلا کے حصص کی قیمت میں 15 فیصد کمی ہوئی، جس کے نتیجے میں مسک کو ایک ہی دن میں 29 ارب ڈالرز کا نقصان برداشت کرنا پڑا۔ اس وقت ان کی مجموعی دولت 301 ارب ڈالرز تک آ گئی ہے جبکہ سال 2025 کا آغاز انہوں نے 433 ارب ڈالرز کے ساتھ کیا تھا۔دسمبر 2024 میں مسک کی دولت 486 ارب ڈالرز کی ریکارڈ سطح پر پہنچ گئی تھی، مگر 2025 میں ٹیسلا کے حصص میں مسلسل گراوٹ نے ان کے اثاثوں کو شدید نقصان پہنچایا۔

یاد رہے کہ ایلون مسک ٹیسلا کے 21 فیصد حصص کے مالک ہیں اور ان کی دولت کا 68 فیصد حصہ اسی کمپنی سے جڑا ہوا ہے۔ایلون مسک کے بعد دنیا کے دوسرے امیر ترین شخص ایمازون کے بانی جیف بیزوز ہیں، جن کی دولت 216 ارب ڈالرز ہے۔ 10 مارچ کو بیزوز کو بھی 4.21 ارب ڈالرز کا نقصان برداشت کرنا پڑا۔مارک زکربرگ 211 ارب ڈالرز کے ساتھ تیسرے نمبر پر، جبکہ فرانس کے برنارڈ آرنلٹ 183 ارب ڈالرز کے ساتھ چوتھے نمبر پر ہیں۔ لیری ایلیسن 169 ارب ڈالرز کے ساتھ پانچویں امیر ترین شخص ہیں۔