کراچی(این این آئی)رمضان المبارک ایک ایسا مقدس مہینہ ہے جو پوری دنیا کے مسلمانوں کے لیے عبادت، رحمت، مغفرت، اور برکتوں کا ذریعہ بنتا ہے۔ لیکن 2030 ایک منفرد سال ہوگا اس سال مسلمان دو مرتبہ رمضان کا استقبال کریں گے، جو ایک نادر اور مبارک موقع ہوگا۔اسلامی ہجری کیلنڈر چاند کے مطابق جبکہ گریگورین کیلنڈر سورج کے گرد زمین کے چکر پر مبنی ہے، اسی فرق کی وجہ سے رمضان المبارک تقریبا ہر 30 سے 33 سال بعد ایک ہی عیسوی سال میں دو بار آتا ہے۔ہجری سال 1451 میں رمضان 5 جنوری 2030 کے آس پاس شروع ہوگا۔

ہجری سال 1452 میں رمضان 26 دسمبر 2030 کو دوبارہ آئے گا۔لہذا مسلمان 2030 میں مجموعی طور پر 36 روزے رکھنے کی سعادت حاصل کریں گے۔ آخری بار ایسا موقع 1997 میں آیا تھا، جبکہ اگلی بار یہ عظیم موقع 2063 میں میسر ہوگا۔ہجری کیلنڈر 354 یا 355 دنوں پر مشتمل ہوتا ہے جبکہ گریگورین کیلنڈر میں 365 دن ہوتے ہیں، اسی وجہ سے ہر سال رمضان المبارک تقریبا 10 دن پہلے آتا ہے۔ اس فرق کی بنا پر ہر 32 سے 33 سال بعد رمضان مختلف موسموں میں گردش کرتا ہے۔2007 سے رمضان گرمیوں میں آ رہا ہے، لیکن اب تقریبا 17 سال بعد یہ موسمِ سرما میں داخل ہو رہا ہے۔2028 (1449 ہجری)میں رمضان سردیوں کے عروج پر ہوگا۔2044 (1466ہجری)میں رمضان گرمیوں کے عروج پر ہوگا۔2031 اور 2032 کے رمضان المبارک سال کے سب سے چھوٹے روزے ہوں گے، جن میں سحری سے افطار تک صرف ساڑھے دس گھنٹے کا وقفہ ہوگا۔ اور یہ سردیوں کا سب سے چھوٹا ترین رمضان ہوگا۔