نوشہرہ (این این آئی)سابق وزیر اعلی خیبر پختونخوا پرویز خٹک نے عمران خان کو پاکستان کا سب سے بڑا جھوٹا قرار دے دیا۔ آبائی گائوں مانکی شریف میں بڑے عوامی جلسے سے خطاب کرتے ہوئے پرویز خٹک نے کہا کہ سیاست کوئی مذاق نہیں کہ ہر کوئی عوام کی خواہشات کے مطابق خدمت کرے، مجھے بہت خوشی ہورہے کہ صوبے کے عوام گزشتہ انتخابات میں غلط اور نااہل لوگوں کو ووٹ دے کر اب رو رہے ہیں۔
پرویز خٹک نے کہا کہ انہوں نے اپنے دور حکومت میں خیبر پختونخوا کے عوام کی بھرپور خدمت کی، گائوں گائوں بجلی اور پینے کا صاف پانی پہنچایا، زرعی زمینوں کیلئے ٹیوب ویل لگوائے، گلیاں اور سڑکیں پکی کروائیں، ہسپتال اپ گریڈ کئے اور اسکول قائم کئے۔ انہوں نے کہا کہ انہوں نے دن رات سیاست کیلئے کام کیا اور عوام کی فلاح و بہبود کو ہمیشہ ترجیح دی۔
انہوں نے کہا کہ پاکستان کا سب سے بڑا جھوٹا عمران خان ہے، جس نے جھوٹے وعدوں کے ذریعے عوام سے ووٹ حاصل کیے۔ انہوں نے کہا کہ گزشتہ انتخابات میں کامیاب ہونے والے ارکان جلد ہی عوام کے دبائو کی وجہ سے بھاگنے پر مجبور ہو جائیں گے۔ پرویز خٹک نے جلسے کے شرکا کو یقین دہانی کرائی کہ وہ عوام کی خدمت کیلئے ہمیشہ حاضر ہیں اور ان کے حقوق کے لیے ہر ممکن جدوجہد جاری رکھیں گے۔
