لاہور( این این آئی)محکمہ موسمیات کی جانب سے 25فروری سے یکم مارچ تک بارش اور ہلکی برفباری کی پیش گوئی کی گئی ہے،25 فروری سے 1 مارچ کے دوران پنجاب کے بیشتر اضلاع میں تیز ہوا چلنے اور بارش کا امکان ہے،مری اور گلیات سمیت دیگر پہاڑی علاقوں میں بارش اور برفباری کی پیش گوئی ہے۔ محکمہ موسمیات کے مطابق25 سے 28 فروری کے دوران لاہور، ٹوبہ ٹیک سنگھ، جھنگ فیصل آباد شیخو پورہ نارووال میانوالی اور سیالکوٹ میں بارش کی پیشگوئی کی گئی۔
سرگودھا بھکر خوشاب حافظ آباد گجرانوالہ منڈی بہاوالدین اور گجرات میں بھی بارش کا امکان ہے۔ 25 سے 27 فروری تک ملتان ڈیرہ غازی خان لیہ مظفرگڑھ خانیوال ساہیوال پاکپتن اوکاڑہ اور بہاولنگر میں بھی ہلکی بارش کے امکانات ہیں۔ بارش کے ساتھ پہاڑی علاقوں میں برفباری بھی متوقع ہے۔ ڈائریکٹر جنرل پی ڈی ایم اے عرفان علی کاٹھیا کا کہنا تھا کہ سیاح موسمی صورتحال کو مد نظر رکھتے ہوئے اپنا پروگرام ترتیب دیں۔ پی ڈی ایم اے کنٹرول روم میں صورتحال کی مانیٹرنگ 24/7 جاری ہے۔ شہری خراب موسم کی صورتحال میں غیر ضروری سفر سے گریز کریں۔ ایمرجنسی صورتحال میں پی ڈی ایم اے ہیلپ لائن 1129 پر کال کریں۔
