اسلام آباد (نیوز ڈیسک)وفاقی حکومت نے 5 فروری 2025 بروز بدھ کو ملک بھر میں یومِ کشمیر کے موقع پر عام تعطیل کا اعلان کیا ہے۔ کابینہ ڈویژن نے اس ضمن میں نوٹیفکیشن جاری کیا، جس کے مطابق تمام سرکاری دفاتر بند رہیں گے۔ نوٹیفکیشن میں مزید کہا گیا ہے کہ اس دن کو کشمیر کے شہداء کی یاد میں ایک منٹ کی خاموشی اختیار کی جائے گی۔اسٹیٹ بینک آف پاکستان نے بھی اپنے اعلامیے میں اس تعطیل کی تصدیق کرتے ہوئے بتایا کہ 5 فروری کو یومِ کشمیر کے موقع پر اس کے دفاتر بند رہیں گے۔

اس کے علاوہ راولپنڈی کی ماتحت عدالتوں میں بھی اس دن چھٹی ہوگی، جبکہ سیشن، سول، فیملی عدالتوں اور ہائی کورٹ میں بھی تعطیل ہوگی۔وفاقی حکومت نے سال کے آغاز میں پورے سال کی تعطیلات کا شیڈول جاری کیا تھا، جس کے مطابق 5 فروری کو یومِ کشمیر کے حوالے سے تعطیل رکھی گئی ہے۔ اس دن سرکاری و نیم سرکاری ادارے بند رہیں گے۔کشمیر سے یکجہتی کے اظہار کے لیے ملک بھر میں تمام تعلیمی ادارے اور بازار بھی بند رہیں گے۔ اس کے علاوہ، گزشتہ ہفتے سندھ حکومت نے بھی 5 فروری کو یوم یکجہتی کشمیر کے حوالے سے سندھ بھر میں عام تعطیل کا اعلان کیا تھا، جس کے مطابق سندھ میں بھی تمام سرکاری اور نیم سرکاری ادارے بند رہیں گے۔