اسلام آباد (نیوز ڈیسک) بنوں میں ہونے والے خودکش حملے میں وطن کے ایک بہادر افسر، لیفٹیننٹ کرنل گلفراز، شہادت کے عظیم رتبے پر فائز ہوگئے۔
اس سانحے نے جہاں پوری قوم کو رنجیدہ کر دیا، وہیں شہید افسر کے آخری واٹس ایپ اسٹیٹس نے لوگوں کے دلوں کو بھی گہرائی سے متاثر کیا اور ایمان تازہ کر دیا۔اہلِ خانہ اور ساتھیوں کے مطابق انہوں نے شہادت سے ایک رات پہلے اور سحری کے وقت اپنے اسٹیٹس پر سورۂ بقرہ کی آخری آیات اور چند مسنون اذکار شیئر کیے تھے، جن میں صبر، ایمان، اطاعت اور اللہ تعالیٰ پر توکل کا جامع درس موجود ہے۔ ان کے اسٹیٹس میں درج الفاظ “بے شک ہم اللہ ہی کے ہیں اور اسی کی طرف لوٹنے والے ہیں” پڑھ کر کئی افراد اشکبار ہو گئے۔ان آیات کے مفہوم میں یہ پیغام شامل تھا کہ رسول اور اہلِ ایمان اللہ کی نازل کردہ کتاب پر یقین رکھتے ہیں، اس کے فرشتوں، رسولوں اور کتابوں پر ایمان لاتے ہیں اور دعا کرتے ہیں کہ اے پروردگار! ہم تیری بخشش چاہتے ہیں اور تیری ہی طرف پلٹنا ہے۔ اسی طرح یہ تعلیم بھی دی گئی کہ اللہ کسی شخص پر اس کی طاقت سے زیادہ بوجھ نہیں ڈالتا، ہر انسان کو اس کے اعمال کے مطابق بدلہ ملتا ہے، اور بندہ اپنے رب سے معافی، رحمت اور آسانی کی دعا کرتا ہے۔شہادت کی خبر سامنے آنے کے بعد جب لوگوں نے ان کا آخری پیغام دیکھا تو سوشل میڈیا پر جذباتی تبصرے آنے لگے۔ کئی صارفین نے لکھا کہ ایسا محسوس ہوتا ہے جیسے انہیں اپنے انجام کا احساس تھا اور وہ مکمل سکون کے ساتھ اپنے رب سے ملاقات کی تیاری کر رہے تھے۔
لیفٹیننٹ کرنل گلفراز کے بارے میں بتایا جاتا ہے کہ وہ نہایت بااخلاق، نرم مزاج اور فرض شناس شخصیت کے مالک تھے۔ وہ اپنے ماتحت اہلکاروں کو ہمیشہ نماز، صبر اور اللہ پر بھروسا رکھنے کی تلقین کرتے رہتے تھے اور دہشت گردی کے خلاف متعدد اہم آپریشنز میں نمایاں کردار ادا کر چکے تھے۔ان کا آخری پیغام آج بھی سوشل میڈیا پر گردش کر رہا ہے اور ہر طرف یہی صدا سنائی دیتی ہے کہ انسان اللہ ہی کا ہے اور اسی کی طرف لوٹ کر جانا ہے۔
