اسلام آباد (نیوز ڈیسک )کاروباری ہفتے کے آغاز پر عالمی اور مقامی مارکیٹوں میں سونے اور چاندی کی قیمتوں میں نمایاں اضافہ دیکھنے میں آیا ہے

۔ آل پاکستان صرافہ جیمز اینڈ جیولرز ایسوسی ایشن کے جاری کردہ اعداد و شمار کے مطابق فی تولہ سونا 3 ہزار روپے مہنگا ہو کر 5 لاکھ 36 ہزار 562 روپے تک جا پہنچا۔اسی طرح 10 گرام سونے کی قیمت میں 2 ہزار 572 روپے کا اضافہ ریکارڈ کیا گیا جس کے بعد اس کی نئی قیمت 4 لاکھ 60 ہزار 15 روپے ہو گئی۔ بین الاقوامی منڈی میں بھی سونے کی قدر میں اضافہ ہوا اور فی اونس نرخ 30 ڈالر بڑھ کر 5138 ڈالر تک پہنچ گئے۔دوسری جانب چاندی کی قیمت بھی اوپر گئی اور فی تولہ چاندی 146 روپے اضافے کے بعد 9 ہزار 94 روپے پر آ گئی۔

ماہرین کا کہنا ہے کہ عالمی معاشی غیر یقینی صورتحال اور سرمایہ کاروں کا محفوظ سرمایہ کاری کے طور پر سونے کی طرف بڑھتا رجحان مستقبل میں بھی قیمتوں میں اتار چڑھاؤ کا باعث بن سکتا ہے۔