کراچی(این این آئی)نوجوان کے محبت کے جھانسے میں آکر پاکستان پہنچنے والی شادی شدہ امریکی خاتون کراچی میں در در کی ٹھوکریں کھانے پر مجبور ہوگئی۔تفصیلات کے مطابق کراچی کے علاقے گارڈن ویسٹ سے تعلق رکھنے والے 19 سالہ لڑکے نے امریکی خاتون کو محبت کا جھانسا دے کر پاکستان بلایا اور فرار ہوگیا۔
امریکی ریاست نیویارک سے تعلق رکھنے والی 33 سالہ اونیا اینڈریو رابنسن شادی شدہ اور دو بچوں کی ماں ہے، جو کراچی سے تعلق رکھنے والے نوجوان کی محبت میں گرفتار ہوکر پاکستانی آگئی تھی۔کراچی آنے کے لیے خاتون نے 5 اکتوبر 2024 کو پاکستان کے ویزے کے لیے رجوع کیا تھا اور اسے 9 اکتوبر کو ایک ماہ کا سیاحتی ویزا جاری کیاگیا تھا تاہم خاتون جب کراچی پہنچی تو لڑکے کے والدین یہ جان کر حیران رہ گئے تھے کہ ان کے بیٹے نے جسے پسند کیا ہے وہ انکے بیٹے سے عمر میں تقریبا دگنی ہے، شوہر سے طلاق لے کر آئی ہے اور دو بچوں کی ماں بھی ہے۔
والدین کی ناراضی پر نوجوان اس خاتون کو چکمہ دے کر غائب ہوا تو خاتون جو رقم لائی تھی اسکی مدد سے کچھ دن تو گزارے پھر ایئرپورٹ آکر بیٹھ گئی اور تقریبا 7 روز سے وہ کراچی ایئرپورٹ پر موجود ہے۔گورنرسندھ نے خاتون کو فوری طور پر پاکستان کا ویزا جاری کرادیا ہے، پیر کو جاری کیا گیا ویزا 11 فروری تک کارآمد ہے، گورنر سندھ نے خاتون کی امریکا واپسی کے ٹکٹ کا بھی بندوبست کرادیا ہے۔
