اسلام آباد (این این آئی)قائمہ کمیٹی برائے داخلہ کی سب کمیٹی کے اجلاس میں زنا کے مجرم کو 25سال قید یا سزائے موت کی تجویز کی مخالفت کردی گئی۔منگل کو سینیٹر ثمینہ ازہری کی صدارت میں سینیٹ کی قائمہ کمیٹی برائے داخلہ کی سب کمیٹی کا اجلاس ہوا جس میں پی پی سی میں ترمیم کے بل پر تبادلہ خیال کیا گیا۔
ترمیم کا بل سینیٹر محسن عزیز کی جانب سے پیش کیا گیا جس میں زنا بالجبر کے ملزمان کی سزا بڑھانے کی تجویز دی گئی ہے۔بل میں زنا کے مجرم کو کم سے کم 25سال قید کی سزا یا پھر سزائے موت تجویز کی گئی جس پر وزارت قانون کے حکام نے بتایا کہ اسلام آباد کیپٹل ٹیرٹری نے اس بل کی مخالفت کی ہے۔چیئرپرسن کمیٹی نے کہا کہ سندھ حکومت کی جانب سے بھی مخالفت کی گئی ہے، سندھ حکومت کے جواب میں تجویز کردہ سزا کو ایبسرڈ قرار دیا گیا ہے۔سپیشل سیکرٹری داخلہ نے اجلاس میں بتایا کہ جی ایس پی کو ہم نے جواب دیا ہے کہ ہم سزائے موت دے نہیں رہے۔کمیٹی چیئرپرسن نے کہا کہ بلوچستان اور پنجاب نے اس بل کی حمایت کی ہے۔سینیٹر محسن عزیز نے کہا کہ زنا کے مجرم کو 25سال یا باقی زندگی جیل میں گزارنی چاہئے۔بعد ازاں سب کمیٹی نے سینیٹر محسن عزیز کے ترمیمی بل کی منظوری دیدی۔
