لوئرچترال(این این آئی)گہریت کنزرویٹیو کمیٹی کے تعاون سے ڈی ایف او وائلڈ لائف لوئر چترال فاروق نبی کی سربراہی میں غیر ملکی شکاری نے گہریت گول میں مارخور کا کامیاب شکار کیا۔محکمہ جنگلی حیات لوئر چترال کے مطابق اتوارکولوئر چترال میں واقع مارخور پوائنٹ گہریت کنزرویٹیو کمیٹی کے حدود میں کشمیری مارخور کا کامیاب ٹرافی شکار ہوا۔

اسپین کا باشندہ کرسٹین پبلو آبیلو گامیزو نے کشمیری مارخور کا پرمٹ شکار کیا، اسپین کے شکاری نے مارخور کے پرمٹ کیلئے 2لاکھ 19ہزار امریکی ڈالر فیس جمع کی تھی جو پاکستانی کرنسی میں 6کروڑ 12لاکھ 57ہزار روپے بنتے ہیں، شکار شدہ مارخور کی عمر 9سال تھی اور سینگوں کی لمبائی 41.5انچ تھی۔واضح رہے کہ ٹرافی شکار سے حاصل ہونے والی رقم کا 80فیصد مقامی کمیونٹی کے ترقیاتی منصوبوں پر خرچ کیا جاتا ہے جبکہ 20فیصد سرکاری خزانے میں جمع ہوتا ہے ۔چترال میں توشی شاہ کنزروینسی میں گزشتہ دسمبر میں ساڑھے7کروڑ روپے پرمٹ فیس ادا کر کے امریکی شکاری نے شکار کیا تھا جو چترال کی تاریخ میں چترال میں مارخور کے شکار کے لیے ادا کی جانے والی سب سے بڑی رقم تھی۔