لاہور( این این آئی)اچھرہ کے علاقہ محمد علی روڈ پر گھریلو جھگڑے پر شوہر نے اپنی بیوی ، سالی اور برادر نسبتی پر فائرنگ کر کے خود کو گولی مار کر زندگی کا خاتمہ کر لیا ۔بتایاگیا ہے کہ کنول کو اپنی بہن فضہ اور شوہر عدنان کے درمیان مبینہ تعلقات کا علم ہوا تو وہ اپنے ماں باپ کے گھر آگئی تھی ۔
گزشتہ روزعدنان اپنی بیوی اور سالی کو ساتھ لے جانے کے لئے آیا جس پر اہل خانہ نے مزاحمت کی تو عدنان نے فائرنگ کر دی جس کی زد میں آکر اس کی اہلیہ کنول، سالی فضہ اور برادر نسبتی شہزاد زخمی ہو گئے ۔ جبکہ عدنان نے خود کو گولی مار کر خودکشی کر لی۔ اطلاع ملتے ہی پولیس اور ریسکیو ٹیم موقع پر پہنچ گئی جس نے تینوں زخمیوں کو فوری طبی امداد کے لئے سروسز ہسپتال منتقل کر دیا ۔ پولیس کی جانب سے جائے وقوعہ سے شواہد اکٹھے کرنے کے بعد لاش کو مردہ خانے منتقل کر کے تحقیقات کا آغاز کر دیا۔
