پشاور(این این آئی)خیبرپختونخوا کے مشیر خزانہ مزمل اسلم نے دعویٰ کیا ہے کہ 2 سال میں 18 لاکھ لوگ ملک چھوڑ گئے ہیں۔ایک بیان میں مزمل اسلم نے کہا کہ وفاقی حکومت کی ٹیکس وصولی مقررہ ہدف سے کم ہے، وفاقی حکومت کی صنعتی ترقی بھی صفر فیصد ہے، شہباز حکومت کی کارپوریٹ پروفٹ گروتھ شرح منفی ہے، وفاقی حکومت صوبوں کو فنڈ کی ادائیگی میں تاخیرکررہی ہے، شہباز حکومت کے دوران ملکی قرضے مسلسل بڑھ رہے ہیں۔

انہوں نے کہا کہ موجود دور میں غربت کی شرح میں مزید اضافہ ریکارڈ ہوا ہے، اسٹاک مارکیٹ سیبیرونی سرمایہ کاری کی تیزی سے واپسی جاری ہے اور ملک میں بیرون سرمایہ کاری تاریخ کی کم ترین سطح پرآچکی ہے۔مشیر خزانہ نے کہاکہ حکومت 2 سال سے بیرون ملک بانڈ بھی جاری نہیں کرسکی، قوت خرید اور بے روزگاری میں مزید اضافہ ریکارڈ ہوا ہے جبکہ ملک سے ہجرت میں بیلگام اضافہ ہوا ہے، اب تک 2 سال میں 18 لاکھ لوگ ملک چھوڑ گئے ہیں۔