وانا (این این آئی)جنوبی وزیرستان کے پہاڑی اور میدانی علاقوں میں سردی کی شدت میں غیر معمولی اضافہ ہوگیا ہے، جس نے زندگی کے تمام شعبوں کو متاثر کیا ہے۔ محکمہ موسمیات کے مطابق آئندہ 14 دسمبر تک ٹھنڈ کی شدت میں مزید اضافے کا امکان ہے۔ اس کے ساتھ یہ پیش گوئی بھی کی گئی ہے کہ اس بار موسمیاتی تبدیلی کے باعث موسم سرما کی سختی صرف ڈیڑھ مہینہ تک محدود ہوگی۔سردی کی شدت کے باعث علاقے کے بچوں اور بزرگوں میں نمونیا، کالی کھانسی اور دیگر موسمی امراض کا خطرہ بڑھ گیا ہے۔

ان حالات کے پیش نظر محکمہ صحت جنوبی وزیرستان نے عوام کو احتیاطی تدابیر اپنانے کی ہدایت جاری کی ہے۔ محکمہ صحت کے مطابق بچوں اور بزرگ افراد کو گرم رکھنے کے لیے فوری اقدامات ضروری ہیں کیونکہ شدید ٹھنڈ کی وجہ سے فالج اور حرکت قلب بند ہونے کا خطرہ بڑھ جاتا ہے۔ماہرین صحت نے عوام کو مشورہ دیا ہے کہ وہ گرم کپڑوں کے استعمال کو یقینی بنائیں اور غذائیت سے بھرپور خوراک استعمال کریں تاکہ قوت مدافعت میں اضافہ ہو۔ مزید برآں، عوام سے اپیل کی گئی ہے کہ وہ بیماری کی صورت میں فوراً قریبی صحت مرکز سے رجوع کریں تاکہ بروقت علاج ممکن ہو سکے۔محکمہ صحت نے متعلقہ اداروں کو بھی ہدایات جاری کی ہیں کہ وہ دور دراز علاقوں میں میڈیکل کیمپ قائم کریں اور طبی سہولیات کی فراہمی یقینی بنائیں۔ عوامی تعاون اور حکومتی اقدامات سے اس مشکل صورتحال پر قابو پانے میں مدد مل سکتی ہے۔