پشاور (این این آئی)قومی اسمبلی میں قائد حزب اختلاف اور پاکستان تحریک انصاف کے سینئر رہنما عمر ایوب نے کہا ہے کہ اسلام آباد میں پارٹی کے حالیہ پر احتجاج کے دوران نہتے کارکنوں پر گولیاں چلائی گئیں اور ہمارے 12 کارکن جاں بحق ہوئے ، 200 لاپتا ہیں۔اتوار کو پارٹی کے دیگر سینئر رہنماؤں اسد قیصر، سینیٹر شبلی فراز اور جنرل سیکریٹری اطلاعات شیخ وقاص اکرم کے ہمراہ پریس کانفرنس کرتے ہوئے عمرایوب نے کہا کہ 5 دسمبر کو عمران خان سے طویل ملاقات ہوئی تھی، جیسے ہی اڈیالہ جیل سے باہر نکلا تو مجھے گرفتار کر لیا گیا تھا، اگلے دن عدالت نے میری رہائی کا آرڈر دیا اور توہین عدالت بھی لگائی۔انہوں نے کہا کہ 24 نومبر کو ہم نے پرامن احتجاج کیا، پرامن احتجاج میں نہتے کارکنوں پر گولیاں چلائی گئیں، جس میں 12 نہتے کارکن مارے گئے، 200 سے زائد کارکن تاحال لاپتا ہیں۔

عمر ایوب نے کہا کہ 5000 ہزار سے زائد ہمارے کارکنان گرفتار ہوئے، 13دسمبر کو جاں بحق کارکنوں کے لیے دعائیہ تقریب ہو گی، 15 دسمبر کو اوورسیز پاکستانی ان کے لیے دعا کریں گے۔انہوں نے کہا کہ ہمارے زخمی کارکنان کو ڈرایا، دھمکایا جا رہا ہے، ملک میں ریاستی دہشت گردی کا بول بالا ہے۔اس موقع پر پی ٹی آئی کے مرکزی اور سینیٹ میں اپوزیشن لیڈر سینیٹر شبلی فراز نے کہا کہ 8 فروری کی غلطی کی وجہ سے ملک انتشار سے دوچار ہے، اس دن ہمارا مینڈیٹ چرایا گیا، غلطی کو چھپانے کیلئے 100 جھوٹ بولیجارہے ہیں۔انہوں نے کہا کہ ملک میں سب کچھ تباہ وبرباد ہوگیا، الیکشن کے بعد سے اب تک ملک میں استحکام نہیں آرہا ہے۔