راولپنڈی (این این آئی)پاکستان تحریکِ انصاف کے رہنما علی محمد خان نے کہا ہے کہ ہمارے 3 مطالبات کا جواب لاشوں کی صورت دیا گیا۔اڈیالہ جیل کے باہر میڈیا سے گفتگو کرتے ہوئے انہوں نے کہا کہ ہماری جماعت نے ابھی 12 لوگوں کے مرنے کی تعداد دی ہے۔علی محمد خان نے کہا کہ میرا یہ کہنا ہے کہ گولی کیوں چلی؟ اپنے جائز حقوق کے لیے آنے والے لوگوں پر گولی چلائی گئی۔
انہوں نے کہا کہ ہم پولیس اور رینجرز کو بھی اپنا مانتے ہیں وہ بھی ہمارے شہداء ہیں، کیا آئین و قانون کی بات کرنے والوں کو خاموش کر دیا جائے گا؟علی محمد خان نے کہا کہ ڈی چوک یا سنگجانی ہمارا اندر کا معاملہ تھا، اس حوالے سے ہمیں کوئی نہ بتائے، جوڈیشل کمیشن میں دونوں اطراف کے شہداء کے معاملے کی تحقیق کی جائے، بانی پی ٹی آئی کی رہائی اس تمام معاملے کے حل کے لیے جادو کی کنجی ہے۔انہوںنے کہاکہ بانی پی ٹی آئی نے کہا ہے کہ وہ باہر نکل کر انتقام نہیں لیں گے، احتجاج میں افغانیوں کی شمولیت کا جواب حکومت اور اداروں سے بنتا ہے، ہم کسی غلط آدمی کو ساتھ نہیں لائے۔
