لاہور( این این آئی)وزرات مذہبی امور حج 2025 کو سستا کرنے کے لیے کوشاں ہے اور اس سلسلے میں اسے پہلی کامیابی مل گئی ہے جس میں اس نے حجاج کے لیے کرائے کی مد میں 50ڈالر کی کمی کرالی ہے۔وزارت مذہبی امور کے ذرائع نے بتایا کہ حجاج کرام کو اب فضائی سفر پر 50ڈالر کم ادا کرنا ہوں گے، گزشتہ برس وزرات مذہبی امور نے ہر حاجی کا کرایہ 850ڈالر دیا تھا۔

رپورٹ کے مطابق رواں سال وزرات مذہبی امور نے پاکستان انٹرنیشنل ایئر لائنز سے 800ڈالر فی حاجی کرایہ طے کیا ہے۔وزارت مذہبی امور نے 35ہزار عازمین کا کوٹہ پی آئی اے کو دیا ہے، سعودی ایئر لائن بھی 35ہزار مسافروں کو حجاز مقدس لے کر روانہ ہوگی۔اس کے علاوہ ایئر سیال کے ذریعے 3500، ایئر بلیو کے ذریعے 7ہزار 300جبکہ سرین ایئر کے ذریعے 7ہزار 500مسافر حجاز مقدس روانہ ہوں گے۔