ملتان (این این آئی) ایف آئی اے نے ملتان ایئرپورٹ سے بھیک مشن پر سعودی عرب جانے کی کوشش کرنیوالی 7خواتین سمیت 9مسافروں کو طیار سے آف لوڈ کردیا۔ایف آئی اے کی جانب سے جاری بیان میں بتایا گیا ہے کہ ملتان سے 9مسافروں نے عمرے کی آڑ میں بھیک مانگنے کیلئے سعودی عرب جانے کی کوشش کی تھی جن کی شناخت خیرات علی، پرویز، کنیز بی بی، فائزہ مائی، کلثوم مائی، آسیہ بی بی، الفت بی بی، نائلہ اور شازیہ شامل ہیں، جن کا تعلق سرگودھا، لیہ ، بھکر اور ملتان سے ہے۔

ایف آئی اے کے مطابق مذکورہ افراد نے مکہ اور مدینہ کے ہوٹلز میں رہائش کیلئے پیشگی بکنگ نہیں کروائی تھی جبکہ وہ عمرے پر آنے والے اخراجات کیلئے اپنی آمد کے ذرائع بتانے میں بھی ناکام رہے۔ایف آئی اے کے مطابق ابتدائی تفتیش کے دوران یہ بات سامنے آئی کہ تمام افراد پہلے ہی مقامات مقدسہ کی زیارت کرچکے ہیں تاہم انہیں عمرے کی ادائیگی سے متعلق کوئی معلومات ہی نہیں تھی، تمام ملزمان کو مزید قانونی کارروائی کیلئے ایف آئی اے کے انسداد انسانی سمگلنگ سیل کے حوالے کردیا گیا ہے۔