لاہور( این این آئی) پاکستان تحریک انصاف نے الزام عائد کیا ہے کہ پولیس نے لاہور میں 21ستمبر کے جلسے سے قبل پی ٹی آئی رہنمائوں اور کارکنوں کے خلاف کریک ڈائون شروع کردیا ہے اور متعدد کارکنوں کو گرفتار کر لیا گیا ہے ۔
پی ٹی آئی کے مطابق لاہور میں غازی آباد، شاہدرہ، ہربنس پورہ، ڈیفنس اور دیگر علاقوں میں چھاپے مارے گئے اور یہ سلسلہ جاری ہے ۔پولیس نے شاہدرہ میں انجینئر یاسر گیلانی کے گھر اور کزن کی فارمیسی پر چھاپہ مارا ،پی ٹی آئی رہنما حماد اعوان کے گھر پر بھی چھاپہ مار کر بھائی اور کزن کو حراست میں لے لیا گیا۔پولیس نے صدر تحریک انصاف لاہور شیخ امتیاز کے گھر پر بھی بھی چھاپہ مارا تاہم شیخ امتیاز گھر پر موجود نہ ہونے کے باعث گرفتار نہ ہوسکے۔
ڈیفنس بی پولیس نے تحریک انصاف کے 12 رہنمائوں اور کارکنوں کے خلاف مقدمہ درج کرلیا ،مقدمہ راستہ بلاک کرنے سمیت دیگر دفعات کے تحت درج کیا گیا ہے جس میں غلام مصطفی، تصور حسین اور غلام محی الدین سمیت دیگر کو نامزد کیا گیا ہے۔تحریک نصاف کے جلسے کی کال پر پولیس نے کنٹینرز بھی پکڑنا شروع کردئیے اور پولیس ذرائع کے مطابق ہفتہ اور اتوار سے قبل ہی شہر کے داخلی راستے بند ہوسکتے ہیں۔ذرائع نے بتایا کہ پکڑے گئے کنٹینرز ممکنہ طور پر امامیہ کالونی پھاٹک، کاہنہ قصور چیک پوسٹ اور بابو صابو پر لگائے جائیں گے۔
