کراچی(این این آئی)جناح انٹرنیشنل ایئرپورٹ سے 20 ہزار ڈالر قطر اسمگل کرنے کی کوشش ناکام بنا دی گئی۔پاکستان کسٹمز جناح انٹرنیشنل ایئرپورٹ کلکٹریٹ نے جناح ٹرمینل کے ڈپارچر لائونج پر ایک کارروائی کے دوران 20ہزار امریکی ڈالر بیرون ملک اسمگل کرنے کی کوشش ناکام بنادی۔
ایڈیشنل کلکٹر کسٹمز فیصل خان نے اس ضمن میں بتایا کہ شہزاد نامی مسافر کیو آر 605 کی پرواز کے ذریعے دوحہ(قطر)روانہ ہورہا تھا۔ یہ مسافر اے ایس ایف سے کلیئرنس حاصل کرنے میں کامیاب ہوگیا تھا لیکن کسٹمز حکام نے شک کی بنا پر سامان کی تفصیلی جانچ پڑتال کی تو مسافر کے سامان سے 14ہزار اور جسم سے 6ہزار امریکی ڈالر برآمد ہوئے۔انہوں نے مزید بتایا کہ کسٹمز حکام نے مقدمہ درج کرکے امریکی کرنسی ضبط کرلی ہے اور اس ضمن میں تحقیقات کا آغاز کردیا ہے۔
