اسلام آباد(این این آئی)وفاقی اسکولوں میں (آج) پیر سے وزیراعظم اسکول میلزپروگرام کا آغاز کر دیا جائے گا جس کے تحت بچوں کو کھانا فراہم کیا جائے گا۔تفصیلات کے مطابق سرکاری پرائمری اسکولوں میں (آج)پیرسے پرائم منسٹر اسکول میلز پروگرام شروع کیا جائے گا،اس پروگرام میں پرائم منسٹرزنیشنل نیوٹریشن انیشیٹو فائر لیس ٹیکنالوجی کا استعمال کیا جا رہا ہے اس پروگرام کے تحت 60,000کھانے پکانے کیلئے جدید ترین سینٹرلائزڈ کچن کا استعمال کیا جائے گا۔

ذرائع کے مطابق اس بھاپ ککنگ ٹیکنالوجی کے ذریعے فوڈ گریڈ کھانا پکانے کے برتنوں میں کھانا پکایا جائے گا،کھانا پکنے کے بعد اسے انسالڈڈ کنٹینرز میں ڈالا جائے گا اور پھر اسکولوں میں ترسیل کیلئے بھیج دیا جائے گا۔پروگرام سے وفاق کے 217پرائمری اسکولوں کے بچے مستفید ہوں گے اور پڑھائی کے ساتھ جب کھانا بھی دستیاب ہوگا تو یقینا بچوں کی اسکول میں حاضری بڑھے گی، اور طلبا کی تعلیم کیساتھ صحت میں بھی بہتری آئے گی۔