اسلام آباد(این این آئی)اسلام آباد الیکٹرک سپلائی کمپنی (آئیسکو)نے غریب محنت کش کے گھر کا بل 18لاکھ 42ہزار روپے بھیج دیا جبکہ محنت کش نے کہاہے کہ ایک ہزار روپے دہاڑی کماتا ہوں، ساڑھے 18لاکھ روپے کیسے ادا کروں گا؟۔اسلام آباد الیکٹرک سپلائی کمپنی نے دینہ کے محنت کش کے گھر کا بل 18لاکھ 42ہزار روپے بھیج دیا۔

دینہ لڈھر کے رہائشی غریب مزدور کا مکان بھی خستہ حال ہے۔محنت کش کے مطابق گذشتہ ماہ کا 56ہزار روپے بجلی کا بل ادھار لے کر جمع کروایا تھا، اگلے ہی ماہ پھر سے اضافی بل بھیج دیا گیا جو سراسر زیادتی ہے۔محنت کش نے کہاکہ ایک ہزار روپے دن کا کماتا ہوں ساڑھے 18لاکھ روپے کیسے جمع کروں؟۔ آئیسکو ترجمان سے بات کی گئی تو حکام کا کہنا تھا کہ کمپیوٹر میں غلط اندراج سے بل زیادہ آگیا ہے جلد درست کردیا جائے گا۔