لاہور( این این آئی)پاکستان سے تعلق رکھنے والی سیما حیدر کے محبت میں مبتلا ہو کر بھارت جانے کے بعد ایک اور پاکستانی لڑکی عشق میں مبتلا ہو کراپنے بچے چھوڑ کر سرحد پار کر گئی ،نئی کہانی کے کردار پاکستان کی مہوش اور راجستھان کے چورو ضلع سے رحمان ہیں۔نجی ٹی وی نے بھارتی میڈیا کے حوالے سے بتایا ہے کہ لاہور کی رہنے والی 25 سالہ مہوش نے بھارتی ریاست راجستھان کے ضلع چورو کے گاں پتھیسر کے رہنے والے 30 سالہ رحمان سے باقاعدہ شادی کرلی ہے۔

رپورٹ کے مطابق دونوں کی ملاقات ایک سوشل میڈیا پلیٹ فارم کے ذریعے آن لائن ہوئی تھی۔اس سے قبل بھارت جانے والی سیما حیدر اور سچن کی ملاقات بھی ایک سوشل میڈیا ایپ پر ہوئی تھی۔ سیما حیدر اپنے چار بچوں کے ساتھ نیپال کے راستے غیر قانونی طور پر ہندوستان جا پہنچی تھی۔بتایا گیا ہے کہ مہوش اپنے دونوں بچوں کو پیچھے چھوڑ کر قانونی طور پر واہگہ بارڈر سے ہندوستان گئی ہے۔مہوش جہاں اپنے شوہر سے طلاق لے چکی ہیں تو وہیں رحمان بھی اپنی بیوی کو چھوڑ چکا ہے اور دونوں کے دو ،دو بچے ہیں۔مہوش برسوں سے پاکستان میں بیوٹی پارلر میں کام کرتی رہی ہیں۔ 2006 میں پاکستان کے بادامی باغ کے خرم شہزاد سے شادی کرنے والی مہوش نے 12 سال بعد 2018 میں اپنے شوہر سے طلاق لے لی تھی۔ اس دوران ان کے دو بیٹے ہوئے۔ ان میں سے ایک بیٹے کی عمر 12 سال اور دوسرے کی عمر 7 سال ہے۔